4 მაისს სამეფო უბნის თეატრის ჰოლიც დეკორაციებმა დაიკავა: ხელნაკეთი ვისკის — Balvenie-ს დეგუსტაცია ორიგინალურ ატმოსფეროში გაიმართა — იატაკზე შოტლანდიის მდელოების სიმბოლო — მწვანე ბალახი იყო დაგებული, სხვადასხვა კუთხეში განლაგებულ კასრებზე კი სხვადასხვა დაძველების Balvenie-ს ჩამოსხმები ელაგა. Balvenie-ს ბრენდ ამბასადორმა — დიმიტრი ჩერკაშინმა სტუმრებს ამჯერად 12, 14 და 17-წლიანი ჩამოსხმები დააჭაშნიკებინა.

დეგუსტაციას სხვადასხვა დარგში მოღვაწე ხელოვანების მასტერკლასი ახლავდა: საშა გოცირიძემ ტყავით შესრულებული აქსესუარები გამოფინა და სტუმრებს მათი დამზადების ტექნოლოგიებზე ესაუბრა, თანაც ყველა სტუმარი სპეციალურად Balvenie-ს გრავირებით გაფორმებული გასაღების საკიდებით დაასაჩუქრა. ირინა ჯიბუტმა და ტასო გომელაურმა Ceramic Studio 1300-ის კერამიკული ნაწარმი გამოფინეს და რამდენიმე მათგანზე მუშაობა სტუმრების თვალწინ დაასრულეს. ლანა ლობილაძემ კი თავისი ხელნაკეთი თოჯინები — „ელფების სერია“ წარადგინა.

სტუმრების აქტიური ჩართულობა გამოიწვია გურამ წიბახაშვილის კუთხემ: ფოტოგრაფი მსურველებს სამახსოვრო პორტრეტებს უღებდა ძველებური „ყუთი აპარატით“.