ადამიანის უფლებების სწავლებისა და მონიტორინგის ცენტრი უერთდება სოციალურად დაუცველი უსახლკარო პირების საპროტესტო აქციას, რომელიც 1 ივნისს 12:00-ზე ეკონომიკის სამინისტროს წინ გაიმართება.

EMC მხარს უჭერს სოციალურად დაუცველთა მოთხოვნებს, და აცხადებს, რომ სახელმწიფო მუდმივად არღვევს უსახლკარო ჯგუფების სათანადო საცხოვრებლის, ჯანმრთელობის დაცვის, განათლების, სოციალური დაცვის, პირადი ცხოვრების ხელშეუხებლობის უფლებებს.

"სახელმწიფო არ აფასებს ქვეყანაში უსახლკარობის მასშტაბს, ამ პირების საჭიროებებს, ასევე უსახლკარობის ფორმებსა და მიზეზებს. ამ დრომდე არ აღრიცხულა უსახლკარო პირთა რაოდენობა, რაც შეუძლებელს ხდის უსახლკარობასთან დაკავშირებული პრობლემების ეფექტიან და თანმიმდევრულ გადაწყვეტას" - აცხადებს EMC.

ადამიანის უფლებების სწავლებისა და მონიტორინგის ცენტრის მიხედვით, საქართველოს კანონმდებლობაში არსებული უსახლკარო პირის დეფინიცია არასრულყოფილია და ის ამ დრომდე არ ითვალისწინებს უსახლკარო პირთა საცხოვრებლის უფლების სტანდარტს.

ხვალინდელი აქიის მონაწილეები სახელმწიფოსგან უსახლკარო პირთა უფლებების აღიარებას მოითხოვენ. სოციალურად დაუცველი უსახლკაროები სახელმწიფოსგან ითხოვენ გაუქმდეს ის საკანონმდებლო ცვლილება, რომლის მიხედვითაც პირები, რომელთაც საცხოვრებელი მიზნით დაკავებული აქვთ სახელმწიფო ობიექტები, ვერ იღებენ სოციალურად დაუცველის სტატუსს და მასთან დაკავშირებულ საარსებო შემწეობას.

EMC მიიჩნევს, რომ უსახლკაროთა მიმართ სახელმწიფოს პოლიტიკა სრულიად არაეფექტიანი და არასაკმარისია.