ქალთა უფლებების დასაცავად აქცია სახელწოდებით - ნუ იცავ გამტაცებელს! თბილისში, დღეს, 15 საათზე გაიმართება. აქციის ორგანიზატორი ქალთა მოძრაობაა.

მოძრაობის წარმომადგენლები მიიჩნევენ, რომ სამართალდამცავი სტრუქტურები ქალის მოტაცებას ტრადიციად მიიჩნევენ და არა დანაშაულად. მსხვერპლისა და მისი ოჯახის მიმართ განხორციელებული ზეწოლით კი, ქალი ცრუ ჩვენებას აძლევს ნებაყოფლობით გათხოვების შესახებ.

"ქალის მოტაცება ისევ ჩვეულებრივ ამბად იქცა, განსაკუთრებით პრობლემურია აზერბაიჯანულ თემში მომხდარი გატაცებები. პოლიცია და პროკურატურა ხელს აფარებს დამნაშავეებს: პოლიცია არ ეძებეს გატაცებულ ქალებს, ელოდება როდის მოილაპარაკებენ ოჯახები და მორიგდებიან; ამის შემდეგ პროკურატურა საპროცესო შეთანხმებას აფორმებს გამომძიებელთან და რამდენიმე ათას ლარად პრაქტიკულად ყიდის გატაცებულ ქალს," - აღნიშნავენ მოძრაობაში.

მათ მიაჩნიათ, რომ მსგავსი პრაქტიკა ქალის ფუნდამეტურ ღირებულებებს არღვევს. მოძრაობა სამართალდამცავებისგან მოითხოვს შეწყვიტონ მსგავსი პრაქტიკის გამოყენება და აღასრულონ კანონის მოთხოვნები.

28 აპრილს ქვემო ქართლში სკოლაში მიმავალი გოგო ცოლად მოყვანის მიზნით გაიტაცეს. გოგო და გამტაცებელი შსს-ს თანამშრომლებმა გუშინ დაკითხეს.