საქართველოს პრემიერმინისტრის, ირაკლი ღარიბაშვილი აცხადებს, რომ ნაციონალური მოძრაობის მიერ შესაძლო "პროვოკაციების" მოწყობის საქმეზე სახელმწიფო უსაფრთხოების სამსახურს ყველა ინფორმაცია აქვს და თუ საჭიროდ ჩათვლიან, გაამჟღავნებენ. მისი თქმით, მთავრობა "მოწოდების სიმაღლეზეა", რომ პროვოკაციებს მოწყობა არ დაუშვან.

"მე ერთი რამ მინდა გითხრათ, არა კეთილისმოსურნე, მტრულად განწყობილი, პროვოკატორი და ა.შ., შესაძლოა იყოს ძალიან ბევრი ადამიანი, მაგრამ ერთი რამ მინდა იცოდეს ყველამ, რომ სახელმწიფო, ჩვენი მთავრობა არის მოწოდების სიმაღლეზე. ჩვენ არავის არ მივცემთ უფლებას, რაიმე პროვოკაცია მოაწყოს. ქვეყნის შიგნით, ჩვენ ყველა მოქალაქეს დავიცავთ, დავიცავთ ჩვენი ქვეყნის სტაბილურობას და მშვიდობას.

ამის თაობაზე რა თქმა უნდა, სუს აქვს კონკრეტული ინფორმაციები და, რა თქმა უნდა, როცა საჭირო იქნება ამ ინფორმაციას გამჟღავნება, თუ იქნება ამის საჭიროება, თუ ჩათვლიან საჭიროდ, მხოლოდ ამის შემდეგ გეცნობებათ თქვენ და საზოგადოებას", — თქვა მან.

სახელმწიფო უსაფრთხოების სამსახურმა სახელმწიფო-პოლიტიკური თანამდებობის პირზე თავდასხმის მუხლით გამოძიება დაიწყო. როგორც უწყებაში განმარტეს, გამოძიება სისხლის სამართლის კოდექსის 325-ე მუხლით 12 აპრილს დაიწყო და ინფორმაცია უკრაინელ კოლეგებს უკვე მიაწოდეს.

15 აპრილს პარლამენტის ვიცე-სპიკერმა, გია ვოლსკიმ ნაციონალური მოძრაობა შესაძლო პროვოკაციებში დაადანაშაულა. მანაც აღნიშნა, რომ ინფორმაცია უკრაინის სპეცსამსახურებს უკვე მიეწოდათ. ვოლსკი ამბობს, რომ ინფორმაცია სუს-ს "საკმაოდ სარწმუნო წყაროსგან" აქვს.