კულტურის მინისტრი, თეა წულუკიანი აცხადებს, რომ უკრაინის პალამენტის თავმჯდომარე, რუსლან სტეფანჩუკი "ძალიან დიდი მოლოდინებით და მოუთმენლად ელოდება" შალვა პაპუაშვილის ხელმძღვანელობით საქართველოს დელეგაციის ვიზიტს.

"ბატონ შალვასა და მათ სპიკერს შორის შედგა საუბარი. რამდენადაც ჩემთის ცნობილია, ეს იყო ძალიან გულითადი და თბილი დიალოგი ორ მაღალი თანამდებობის პირს შორის და იქ საბოლოოდ გადაწყდა, რომ ეს ვიზიტი შედგებოდა. ჩემთვის რამდენადაც ცნობილია, უკრაინული მხარე, ამ შემთხვევაში უკრაინის პარლამენტის თავმჯდომარე ძალიან დიდი მოლოდინითა და მოუთმენლად ელოდება ჩვენი პარლამენტის სპიკერის ხელმძღვანელობით ჩვენს იქ ვიზიტს", — თქვა მან იმედის ეთერში.

შეგახსენებთ, რომ პაპაუაშვილმა გადაიფიქრა და უკრაინაში ვიზიტს გეგმავს. მეტიც, მან უკრაინაში გასამგზავრებლად დელეგაციაში მონაწილეობა ყველა პოლიტიკურ ჯგუფს შესთავაზა.

მანამდე, 8 აპრილს საქართველოში უკრაინის საქმეთა დროებითმა რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევდა, რათა საკუთარი თვალით ნახონ იქ ჩადენილი დანაშაულები. პაპუაშვილი ამბობდა, რომ რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანდა.

"არის თუ არა სათანადო, "არასათანადო" უწოდო მეგობარ ქვეყანაში ჩასვლის მოწვევას, რომ დაინახო მისი უბედურება, გაიზიარო მისი მწუხარება, უთხრა მხარდამჭერი სიტყვები? მგონია, რომ მეგობარმა ეს უნდა გააკეთოს მოწვევის გარეშე", — ასე უპასუხა მაშინ უკრაინის რადას თავმჯდომარემ კოლეგას.

13 აპრილს პაპუაშვილსა და სტეფანჩუკს ონლაინშეხვედრა ჰქონდათ. პარლამენტის განცხადებით, ისინი შეთანხმდნენ, რომ გაუგებრობის თავიდან ასარიდებლად კომუნიკაცია მნიშვნელოვანია. იმავე დღეს რადას თავმჯდომარემ დაწერა, რომ საქართველოსა და უკრაინას შორის არსებული მცირე გაუგებრობები დასრულა. მისი თქმით, უკრაინაში დეპუტატების ვიზიტი დაადასტურებს ქვეყნებს შორის მეგობრულ ურთიერთობას.

ამავე თემაზე: