ირლანდიის საგარეო საქმეთა მინისტრი, საიმონ კოვენი კიევში იმყოფებოდა და განაცხადა, რომ ირლანდია სამხედრო თვალსაზრისით ნეიტრალური ქვეყანაა, თუმცა ომის მიმართ ნეიტრალურები არ არიან. ის გაეროს უშიშროების საბჭოს პირველი საგარეო საქმეთა მინისტრია, რომელიც უკრაინას რუსეთის შეჭრის შემდეგ ეწვია.

"ვაცნობიერებ, რომ უკრაინას არ სურს თანაგრძნობა, მას სჭირდება ქმედება და ძლიერი პრაქტიკული მხარდაჭერა საკუთარი თავის დასაცავად და მიუხედავად იმისა, რომ ირლანდია სამხედრო თვალსაზრისით ნეიტრალურია, ნება მომეცით მკაფიოდ გითხრათ, რომ ჩვენ არ ვართ ნეიტრალური ამ ომის, კონფლიქტის და თქვენი ქვეყნის მომავლის მიმართ.

ჩვენ ვიცით, რომ უკრაინელები ოცნებობენ სხვა ტიპის მომავალზე, რომელიც დაფუძნებულია დემოკრატიაზე, სტაბილურობასა და ეკონომიკურ შესაძლებლობებზე და გვჯერა, რომ ამის მიღწევა შესაძლებელია ევროკავშირის სრულუფლებიანი წევრობის გზით. ირლანდია მხარს დაუჭერს, რომ ეს რაც შეიძლება სწრაფად მოხდეს", — თქვა ირლანდიის საგარეო საქმეთა მინისტრმა.

დედაქალაქის იმ ნაწილების მონახულების შემდეგ, რომლებიც უშუალოდ დაზიანდა რუსეთის მიერ, ასევე უკრაინის საგარეო საქმეთა მინისტრთან, დმიტრო კულებასთან და თავდაცვის მინისტრ ალექსეი რეზნიკოვთან შეხვედრის შემდეგ, კოვენმა თქვა, რომ რუსული ძალების მიერ უკრაინელი მშვიდობიანი მოსახლეობის მკვლელობა ომის დანაშაულია.