შინაგან საქმეთა სამინისტროს ინფორმაციით, ოჯახის წევრების მიმართ ჩადენილი დანაშაულებისთვის 2000 წელს დაბადებული ერთი პირი დააკავეს. უწყების ცნობით, ის მცირეწლოვანი შვილზე და მისი თანდასწრებით მეუღლეზე ძალადობის, ოჯახის წევრისთვის თავისუფლების უკანონო აღკვეთისა, მუქარისა და ნივთის დაზიანების ბრალდებით დააკავეს.

შსს-ის ცნობით, გამოძიებით დადგინდა, რომ მცირეწლოვანი შვილის თანდასწრებით, გენდერული დისკრიმინაციის ნიშნით შეუწყნარებლობის მოტივით, მეუღლეს სისტემატურად აყენებდა ფიზიკურ შეურაცხყოფას და სიცოცხლის მოსპობით ემუქრებოდა.

"ბრალდებულმა მამაკაცმა მიმდინარე წლის 5 აპრილს ფიზიკურად იძალადა მეუღლეზე, წაართვა მას ტელეფონი და დაუმტვრია, რათა პოლიციაში არ დაერეკა, რის შემდეგაც ჩაკეტა სახლში და მეორე დილამდე არ აძლევდა სახლიდან გასვლის შესაძლებლობას. გამოძიებით ასევე დადგინდა, რომ დ.გ-მ ფიზიკური შეურაცხყოფა მიაყენა თავის მცირეწლოვან შვილს და მეუღლის დედას, რომელსაც სიცოცხლის მოსპობით დაემუქრა", — აცხადებენ უწყებაში.

გამოძიება 11 პრიმა-151-ე მუხლის მე-2 ნაწილის დ ქვეპუნტქით, 126 პრიმა მუხლის პირველი ნაწილით, 11 პრიმა-126-ე მუხლის მე-2 ნაწილის კ ქვეპუნქტით, 11 პრიმა-187-ე მუხლის პირველი ნაწილით, 11 პრიმა-143-ე მუხლის მე-2 ნაწილის გ ქვეპუნქტით და მე-3 ნაწილის ე ქვეპუნქტით, 126 პრიმა მუხლის მე-2 ნაწილის ა და ბ ქვეპუნქეტებით მიმდინარეობს. დანაშაული 10 წლამდე ვადით თავისუფლების აღკვეთას ითვალისწინებს.