ქართული ოცნების დეპუტატის, გია ვოლსკის განცხადებით, უკრაინაში ჩასვლასთან არის "გარკვეული საკითხები". მისი თქმით, შესაძლოა, პოზიციებიც გაიყოს. ამის შესახებ ვოლსკიმ ბიუროს სხდომაზე თქვა, სადაც უკრაინაში ქართული დელეგაციის ჩასვლის საკითხს განიხილავდნენ.

"რაც შეეხება ჩასვლას, ვნახოთ, ამასთან დაკავშირებით არის რაღაც გარკვეული საკითხები, შეიძლება, პოზიციებიც გაიყოს", — თქვა მან.

გია ვოლსკის განცხადებით, არავის ექსკლუზიური უფლება არ არის, ვინ ჩავა და ვინ არა უკრაინაში. მისივე თმით, ოპოზიციამ მხარი უნდა დაუჭიროს ქართული ოცნების ოფიციალურ პოზიციას, რომელიც მისი შეფასებით გაეროსა და სხვა ტრიბუნებზე გამოიხატა.

"არავის ექსკლუზიური უფლება არ არის შეაფასოს მდგომარეობა და წარმოიდგინეთ, ეს არც პარტიული და არც პიროვნული თემების წყენას არ ეხება. არანაირად არ შეიძლება იყოს მითუმეტეს განხილული რომელიმე პარტიული და იცით თქვენ, ვისზეც არის ლაპარაკი, იმის რაღაც ექსკლუზიური უფლება, უკრაინაში ვინ ჩავიდეს, ვინ არ ჩავიდეს და ვინ როგორ უნდა მოიქცეს, მითუმეტეს არავის არ ეშლება საქციელი და დამოკიდებულებები ამასთან დაკავშირებით კარგი იქნებოდა თუ კი პოლიტიკური პარტიები და ჯგუფები მხარს დაუჭერდნენ საქართველოს ხელისუფლების მიერ გადადგმულ ნაბიჯს, იმასთან დაკავშირებით, რომ პარლამენტის ტრიბუნას მიმართეს სხვა 38 ქვეყანასთან ერთად", — ამბობს ის.

დღეს, 11 აპრილს მამუკა მდინარაძემ თქვა, რომ პროტოკოლური საკითხების მოგვარების შემდეგ, შეიძლება, უმრავლესობის წარმომადგენლები ჩავიდნენ უკრაინაში.

8 აპრილს საქართველოში უკრაინის საქმეთა დროებითი რწმუნებულმა, ანდრეი კასინოვმა განაცხადა, რომ რადას თავმჯდომარე ყველა პარლამენტარს, მათ შორის, შალვა პაპუაშვილს ბუჩაში იწვევს, რათა საკუთარი თვალით ნახონ იქ ჩადენილი დანაშაულები. პაპუაშვილის განცხადებით, რიგი "საკითხების განუმარტებლობის ფონზე, ოფიციალური მოწვევა არასათანადოდ ჩანს". პარლამენტის თავმჯდომარემ თქვა ისიც, რომ უკრაინის და უკრაინელი ხალხის მხარდაჭერა ადამიანური და ისტორიული ვალია. პაპუაშვილი ამტკიცებს, რომ ამ ვალს ყველა შემთხვევაში შეასრულებენ, "რაც უნდა უსამართლო და უსაფუძვლო ბრალდებები" ესმოდეთ პასუხად.

ამავე თემაზე: