ქართული ოცნების დეპუტატი, ანრი ოხანაშვილი ამბობს, რომ უკრაინაში მიმდინარე ომის პარალელურად, საქართველოს მიმართ "არაერთი ბინძური პროვოკაცია" ხორციელდება, თუმცა ამბობს, რომ "საზოგადოება საკმაოდაა გაზრდილი", რათა "კარგი დასკვნები გამოიტანოს".

"ძალიან მძიმეა ახლა საუბარია უკრაინის ხელისუფლებასთან მიმართებაში, რომელიც არის ჩართული ომში და რომელიც იცავს თავისი ქვეყნის ტერიტორიულ მთლიანობას, მაგრამ ჩვენ ვართ მომსწრე ყველა, რომ ომის პარალელურად საქართველოსთან მიმართებაში ხორციელდება არაერთი ბინძური პროვოკაცია.

რას შეიძლება ეს ნიშნავდეს, მე მგონია, რომ ჩვენი საზოგადოება საკმაოდ გაზრდილია იმ თვალსაზრისით, რომ აფასებს საკითხებს ისტორიული კონტექსტით, გეოპოლიტიკური თვალსაზრისით და ძალიან კარგი დასკვნები გამოაქვს", — თქვა მან.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: