საგარეო საქმეთა და უსაფრთხოების პოლიტიკის სფეროში ევროკავშირის უმაღლესი წარმომადგენლის ჯოზეფ ბორელის გადაწყვეტილებით, დიპლომატიური სტატუსის საწინააღმდეგო საქმიანობაში ჩართულობისთვის ბრიუსელში რუსეთის მუდმივი წარმომადგენლობის 19 წევრი პერსონა ნონ გრატად გამოცხადდა.

ევროკავშირის განცხადებით, გადაწყვეტილება მიიღეს მას შემდეგ, რაც გავრცელდა ინფორმაცია უკრაინის ქალაქებში, განსაკუთრებით ბუჩაში რუსეთის შეიარაღებული ძალების მიერ ჩადენილ სისასტიკის შესახებ.

"ევროკავშირი სრულ სოლიდარობაშია უკრაინისა და უკრაინელი ხალხის მიმართ და გააგრძელებს ყველა შესაძლო მხარდაჭერას საერთაშორისო პარტნიორებთან კოორდინირებით", — ვკითხულობთ განცხადებაში.

დღეს ევროკავშირმა რუსეთის წინააღმდეგ სანქცების ახალი პაკეტი წარადგინა. ევროკომისიის პრეზიდენტის, ურსულა ფონ დერ ლაიენის განცხადებით, მუშაობენ დამატებით სანქციების დაწესებაზეც.