სააპელაციო სასამართლოში რუსთავი 2-ის საქმის განხილვის თემაზე სერგო რატიანმა რუსთავი 2-ის ჟურნალისტს განუცხადა, რომ ხელისუფლება ცდილობს მისთვის არახელსაყრელი მაუწყებლობის დაქვემდებარებას, რათა ოქტომბრის არჩევნების გაყალბება არ გაუჭირდეს:

"მიმდინარეობს საკუნსტიტუციო სასამართლოსა და რუსთავი 2-ის დაქვემდებარება და პარალიზება. ყველაფერი კეთდება იმისთვის, რომ ხელისუფლებას აგვისტოდან აღარ ჰქონდეს შემაფერხებელი ფაქტორი იმისთვის, რომ გააყალბოს არჩევნები. ყველაფერი კეთდება იმისთვის, რომ გაყალბების დროს არ იყოს რუსთავი 2".

სერგო რატიანმა დასძინა, რომ არჩევნებზე გაყალბების გარდა ფიზიკური დაპირისპირებაც არის მოსალოდნელი, ისე როგორც ეს კორცხელში მოხდა:

"კორცხელის ინციდენცტზე ხელისუფლების წარმომადგენლები პირდაპირ ამბობენ, რომ ამხელა აურზაური რუსთავი 2-ის გამოა ატეხილი და არა იმ რეალობის გამო, რაც თავად ჩაიდინეს".

სერგო რატიანის თქმით, ხელისუფლება ცდილობს თავისი დანაშაულებების დაფარვას, რაშიც რუსთავი 2 მათ ხელს უშლის. ამიტომაც არის ის მათთვის "არახელსაყრელი მაუწყებლობა".

თბილისის სააპელაციო სასამართლოში რუსთავი 2-ის საქმეს მოსამართლეები, ნათია გუჯაბიძე, ნატა ნაზღაიძე და შორენა ყაველაშვილი განიხილავენ. პროცესის პარალელურად სასამართლოს ეზოში აქცია მიმდინარეობს.

ტელეკომპანიის მხარდასაჭერად შეკრებილები არიან ადამიანები, რომლებიც მიიჩნევენ, რომ მოსამართლეები პოლიტიკურ ზეწოლას დაექვემდებარებიან და საქალაქო სასამართლოს გადაწყვეტილებას, რუსთავი 2-ის ქიბარ ხალვაშისთვის მიკუთვნებასთან დაკავშირებით, ძალაში დატოვებენ. მსგავსი განწყობა აქვთ სასამართლოში მისულ პოლიტიკოსებსა და თავად რუსთავი 2-ის მენეჯმენტს.