უკრაინის მართლმადიდებელი ეკლესიის წინამძღოლი, მიტროპოლიტი ეპიფანე ბუჩის ტრაგედიას ეხმაურება და წერს, რომ "რუსული მშვიდობის" იდეოლოგია ნაციზმის იდეოლოგიაა მისი ერთ-ერთი შემქმნელი კი რუსეთის პატრიარქი კირილეა.

"რუსული მშვიდობის" იდეოლოგია იგივეა, რაც ნაციზმის იდეოლოგია. ის ამართლებს ძალადობას, მკვლელობას, ომს და გენოციდს და ამიტომ უნდა უარყონ და გაასამართლონ ისევე, როგორც გასაამართლეს ნაციზმი, მისი იდეოლოგია და დანაშაულები. ამ კრიმინალური იდეოლოგიის შემქმნელები და ხელშემწყობები არიან მოსკოვის საპატრიარქოს მეთაური კირილე და მისი მიმდევრები. ის თავის ქვეშევრდომებთან ერთად არა მხოლოდ აღვივებდა ცეცხლს, არამედ ღიად, ღვთისა და ეკლესიის სახელით,ტყუილი პოსტულატებით, ლოცავდა ჯალათებს, მკვლელებსა და მათ შავ საქმეს", — წერს ის.

მიტროპოლიტი ეპიფანე აცხადებს, რომ ოკუპანტები და მათი მხარდამჭერები შავ, ეშმაკის საქმეს აკეთებენ და ისინი სტალინის დანაშაულისა და გოლოდომორის რეპრესიების გამგრძელებლები არიან.

მიტროპოლიტის თქმით, რუსეთის პატრიარქმა არჩევანი ანტიქრისტეს სასარგებლოდ გააკეთა. მანვე აღნიშნა, რომ ამ ქმედებების დაგმობა ყველა ადამიანის, განსაკუთრებით კი მართლმადიდებელი ქრისტიანების მორალური ვალდებულებაცაა.

"მან საკუთარი არჩევანი გააკეთა ანტიქრისტეს სასარგებლოდ. მოვუწოდებ მათ, ვინც ამ დრომდე მიიჩნევს მას საკუთარ მწყემსად, გაახილეთ თვალები, შეხედეთ, მისი სწავლების შხამიან ნაყოფს, ჩამოშორდით ამ უკანონობას, აღარ იყოთ მისი თანამზრახველები", — ამბობს ის.

გარდა ამისა, მიტროპოლიტმა საერთაშორისო საზოგადოებას დაუყოვნებლივი რეაგირებისკენ მოუწოდა. მიტროპოლიტი დასძენს, რომ მათ იარაღთან ერთად, მორალური პასუხისმგებლობა აქვთ, რომ ტირანი დასაჯონ.

"ჩვენი მილიონობით მორწმუნის, ჩვენი ტანჯული ერის, რუსი დამპყრობლების მიერ გაუპატიურებულთა, წამებულთა, დახვრეტილთა სახელით, რომელთა სისხლი შეჰღაღადებს ცას, ჩვენ ისევ ვიმაღლებთ ხმას და მივმართავთ საერთაშორისოს. საზოგადოებას: ყველაფერი გააკეთეთ სასწრაფოდ, რათა შეჩერდეს და დასაჯოს ტირანი და სახელმწიფო, რომელიც მის ხელში უკრაინელი ხალხის გენოციდის იარაღი გახდა. თქვენ გაქვთ ძალა, გაქვთ იარაღი, თქვენ გაქვთ მორალური პასუხისმგებლობა გააკეთოთ ეს, დაეხმაროთ უკრაინელ ხალხის, თქვენსა და კაცობრიობის დაცვაში", — წერს ეპიფანე.

მოსკოვისა და სრულიად რუსეთის პატრიარქმა კირილემ რუსეთის შეიარაღებული ძალების მთავარ ტაძარში წირვა ჩაატარა, სადაც ამტკიცებდა, თითქოს რუს ხალხს არ აქვს სურვილი აწარმოოს ომი ან ზიანი მიაყენოს სხვებს. თუმცა იქვე კირილეს განცხადებები ომს ამართლებდა — მან ხაზი გაუსვა, რომ რუსები "სამშობლოს იცავენ".