სახელმწიფო უსაფრთხოების სამსახურში ამბობენ, რომ ირაკლი სესიაშვილის შვილს, დავით სესიაშვილს დანაშაული არ ჩაუდენია და ის კანონის დაცვით დასაქმდა უწყებაში. ეს განცხადება სუს-მა ნაციონალური მოძრაობის მიერ სესიაშვილის მიმართ გავრცელებული ბრალდების საპასუხოდ გაავრცელა.

"დავით სესიაშვილის სამსახურში მიღებამდე მისი კანდიდატურის შესწავლა კანონის სრული დაცვით მოხდა. შესწავლის შემდეგ, მის მიერ ჩადენილი რაიმე სახის კანონდარღვევა არ გამოვლენილა და აღნიშნული პირი აყვანილი იქნა სამსახურში," - ამბობენ სუს-ში.

ერთიანი ნაციონალური მოძრაობის ინფორმაციით, მთავარი პროკურორის ჩარევით საქართველოს პარლამენტის დეპუტატის, ირაკლი სესიაშვილის შვილის, დავით სესიაშვილის დანაშაულებრივი საქმე მიჩქმალა. პარტიაში აღნიშნავენ, რომ დანაშაულის შესახებ ინფორმირებული იყვნენ სახელმწიფო უსაფრთხოების სამსახურშიც.

ირაკლი სესიაშვილი ნაციონალური მოძრაობის მიერ მისი შვილის მიმართ გამოთქმულ ბრალდებებს თავის საქმიანობას უკავშირებს. სესიშვილის თქმით, ნაციონალურმა მოძრაობამ ცრუ ინფორმაცია გაავრცელა და ამის გამო სასამართლოში ჩივილს გეგმავს.