აქტივისტი, სამირა ბაირამოვა, რომელსაც მარნეულში ალტ-ინფოს ოფისზე ბანერების ევროკავშირისა და უკრაინის დროშის ფერებში შეღებვის გამო სიცოცხლის მოსპობით ემუქრებოდნენ, აცხადებს, რომ მას დაზარალებულის სტატუსი მიანიჭეს.

"უკვე დაზარალებულის სტატუსი მაქვს, ამ სტატუსით ველოდები სასამართლო პროცესს", — წერს ის ფეისბუქგვერდზე.

ალტ-ინფოს ოფისზე ბანერების შეღებვის შემდეგ სამირა ბაირამოვამ მუქარის შემცველი და შეურაცხმყოფელი შეტყობინებები მიიღო. მან საგამოძიებო უწყებას იმავე დღეს მიმართა. შსს-მ გამოძიება სისხლის სამართლის 151-ე მუხლით დაიწყო, რაც სიცოცხლის მოსპობის ან ჯანმრთელობის დაზიანების მუქარას გულისხმობს.

20 მარტს ბაირამოვამ დაწერა, რომ ალტ-ინფომ პირველი მუქარა შეასრულა და მარნეულში ენმ-ის ოფისი შეღებეს. აქტივისტმა ფოტოები გამოაქვეყნა, სადაც ჩანს, რომ ენმ-ის ოფისზე შეურაცხმყოფელი წარწერებია გაკეთებული.

21 მარტს პარლამენტის თავმჯდომარემ, შალვა პაპუაშვილმა ბაირამოვასთან დაკავშირებით დასმულ შეკითხვაზე თქვა, რომ მუქარისა და ჰეითერული კამპანიის სამიზნე გამხდარა ყველა, ვინც სოციალურ ქსელში აქტიურია.