უკრაინაში მინისტრთა კაბინეტის ვებგვერდები არ იხსნება, ვრცელდება ინფორმაცია მასობრივი DDoS შეტევაზე. ციფრული ტრანსფორმაციის მინისტრი მიხაილ ფედოროვი ტელეგრამზე წერს, რომ კიბერშეტევა 4 საათზე დაიწყო.

"დაახლოებით საღამოს 4 საათზე დაიწყო მორიგი მასობრივი DDoS შეტევა სახელმწიფოზე. ჩვენ გვაქვს შესაბამისი მონაცემები არაერთი ბანკიდან, ასევე არის პრობლემები უმაღლესი რადას (უკვე მოქმედებს), მინისტრთა კაბინეტისა და საგარეო საქმეთა სამინისტროს ვებგვერდებზე წვდომასთან დაკავშირებით. ეს გამოწვეულია ტრაფიკის სხვა პროვაიდერზე გადართვით, რათა შემცირდეს შეტევისგან მიღებული ზიანი", — წერს ის.

როგორც BBC-ის უკრაინული გამოცემა წერს, უკრაინის რადას, მინისტრთა კაბინეტის, საგარეო საქმეთა სამინისტროს, უკრაინის უსაფრთხოების სამსახურისა და ეროვნული პოლიციის ვებგვერდები გათიშულია. თუმცა, სახელმწიფო ორგანოების გვერდები სოციალურ ქსელებში კვლავ მუშაობს. მათივე ინფორმაციით, თავდასხმა ზოგიერთ მედიაზეც განხორციელდა, მაგალითად კანალ 24-ს ასახელებს.

უკრაინა არაერთხელ გამხდარა რუსული კიბერშეტევის სამიზნე, ეს ოკუპანტი ქვეყნის ჰიბრიდული ომის ნაწილია. რუსული კიბერშეტევის სამიზნე არაერთხელ იყო საქართველოც.