ამერიკელი დევიდ ბაო აპირებს სასამართლოში უჩივლოს ავიაკომპანია United Airlines-ს, რომლის თვითმფრინავიდანაც ის 10 აპრილს ძალის გამოყენებით გაიყვანეს. ბაოს ადვოკატმა და შვილმა პრესკონფერენცია 13 აპრილს გამართეს, სადაც თქვეს, რომ დაზარალებულმა თვითმფრინავიდან ძალით გაყვანისას დაკარგა ორი კბილი, გაუტყდა ცხვირი და მიიღო ტვინის შერყევა, მას უახსლოეს მომავალში ოპერაცია გაუკეთდება.

როგორც დევიდ ბაოს ადვოკატმა თქვა, ისინი ავიაკომპანიას სასამართლოში უჩივლებენ.

2017 წლის 10 აპრილს, ამერიკული ავიაკომპანია იუნაიტედის თვითმფრინავი ჩიკაგოდან აეროპორტიდან გასაფრენად ემზადებოდა. როგორც აღმოჩნდა, ავიაკომპანიამ აღნიშნულ რეისზე იმაზე მეტი ბილეთი გაყიდა, ვიდრე თვითმფრინავში ადგილი იყო. ამის გამო, ავიაკომპანიამ შემთხვევით შერჩეულ ოთხ მგზავრს, მათ შორის დევიდ ბაოს სთხოვა კომპენსაციის, $800-ის სანაცვლოდ ბორტი დაეტოვებინა და სხვა თვითმფრინავით გაფრენილიყო. ბაოს გარდა ყველა დაეთანხმა ამ წინადადებას. როგორც მან თქვა, ის აუცილებლად უნდა ჩასულიყო დანიშნულების ადგილზე, რადგან სამსახურში ეჩქარებოდა.

მას შემდეგ რაც ავიაკომპანიის თანამშრომლებმა ბაოს დაყოლიება ვერ შეძლეს, გამოიძახეს ჩიკაგოს პოლიცია, რომლებმაც მგზავრი თვითმფრინავიდან ძალის გამოყენებით გაიყვანეს. სხვა მგზავრებმა გადაიღეს აღნიშნული ფაქტი. ვიდეოზე ჩანს, თუ როგორ მიათრევენ პოლიციელები დევიდ ბაოს, მას კი სახე დასისხლიანებული აქვს.

იუნაიტედის პრეზიდენტმა საჯაროდ მოიხადა ბოდიში ამ ინციდენტის გამო, თუმცა ამან ვერ შეაჩერა ის კრიტიკის ტალღა, რაც ავიაკომპანიის მიმართ წამოვიდა. ჩიკაგოს მთავარ აეროპორტში საპროტესტო აქციებიც კი გაიმართა. ინიციდენტის შემდეგ ავიაკომპანია საბაზრო ღირებულებას ყოველდღიურად, ელვის სისწრაფით კარგავს. კომპანიის ღირებულება უკვე შემცირდა $800 მილიონზე მეტით.