საქართველოს პარლამენტის თავჯდომარის მოადგილე და ფრაქცია ქართული ოცნება - კონსერვატორების წევრი ზვიად ძიძიგური ტელეკომპანია რუსთავი 2-თან საუბრისას აცხადებს, რომ კონსტიტუციაში ქორწინების განსაზღვრებაზე ჩანაწერის გაკეთება აუცილებელია და ასე ფიქრობს პარტიის უმრავლესობა:

"ზოგან დააკანონეს ერთნაირსქესიანთა ქორწინება, ზოგან არ დააკანონეს. ჩვენთან ვფიქრობ, რომ ის რაც წერია სამოქალაქო კოდექსში, უნდა ჩაიწეროს კონსტიტუციაში. ამას ემხრობა ძალიან ბევრი წარმომადგენელი".

რაც შეეხება საკონსტიტუციო ცვლილებების პაკეტში პრეზიდენტის შესახებ ცვლილებას, ამაზე ძიძიგური აცხადებს, რომ წარმოდგენილი ცვლილებებით, პრეზიდენტის უფლებამოსილება შესაბამისობაში მოდის საპარლამენტო რესპუბლიკის პრეზიდენტის უფლებამოსილებასთან, რაც მისი თქმით, სწორია.

მმართველი გუნდის გადაწყვეტილებით, იცვლება საქართველოს კონსტიტუცია, ახალ კონსტიტუციაში კი არაერთი მნიშვნელოვანი ცვლილებაა. მათ შორის, ცვლილებები შეეხება პრეზიდენტის უფლებამოსილებებს, ასევე, კონსტიტუციაში ჩნდება ჩანაწერი ქორწინების რაობის შესახებ.

კონსტიტუციის პროექტით, ქორწინება განსაზღვრულია როგორც კავშირი მხოლოდ ქალსა და მამაკაცს შორის, ხოლო ლგბტ წყვილებს დაქორწინება კონსტიტუციის დონეზე ეკრძალებათ. ამჟამად მოქმედი კონსტიტუციით, განსაზღვრული არ არის რა არის ქორწინება. აღნიშნული საკითხი დარეგულირებულია სამოქალაქო კოდექსით.

საქართველოს პარლამენტის თავმჯდომარის პირველი მოადგილე თამარ ჩუგოშვილი ზვიად ძიძიგურს არ ეთანხმება და კი მიიჩნევს, რომ კონსტიტუციაში ქორწინების განსაზღვრის შესახებ ჩანაწერი აუცილებელი არაა.

გეი ქორწინების კონსტიტუციური აკრძალვა ქართული ოცნების ერთ-ერთი მთავარი წინასაარჩევნო დაპირება იყო.

არასამთავრობო ორგანიზაციები აცხადებენ, რომ ქორწინების აკრძალვის შემთხვევაში, ლგბტ წყვილებს სამოქალაქო პარტნიორობის უფლება უნდა ჰქონდეთ.