ირაკლი ღარიბაშვილის თქმით, 2021 წელს, 2012 წელთან შედარებით, ღვინის ექსპორტი 360%-ით არის გაზრდილი. პრემიერმინისტრმა ამის შესახებ მთავრობის სხდომაზე ისაუბრა.

ღარიბაშვილმა ექსპორტის მაჩვენებლები ბოლო 9 წლის ჭრილში განიხილა და თქვა, რომ 2021 წელს საქართველოდან უცხოეთში რეკორდულად მაღალი ოდენობის ღვინო გავიდა.

"2012 წელთან შედარებით ღვინის ექსპორტი 360%-ით არის გაზრდილი თითქმის. 2012 წელს ექსპორტით მიღებული შემოსავალი თუ იყო 71 მილიონი დოლარი, შარშან იყო 250 მილიონი აშშ დოლარი — ამხელა სხვაობაა ამ 8-9 წელიწადში, რაც რეკორდულად მაღალი მაჩვენებელია.

2021 წელს საქართველოდან მსოფლიოს 62 ქვეყანაში ექსპორტირებულია 107 მილიონი ბოთლი ღვინო, რაც დამოუკიდებელი საქართველოს ისტორიაში არის მაქსიმუმი, ასეთი მაჩვენებელი არ ყოფილა არასოდეს", — თქვა პრემიერმინისტრმა.

ღარიბაშვილის თქმით, ბოლო 9 წელში გაზრდილია იმ კომპანიების რაოდენობაც, რომლებსაც ქართული ღვინო უცხოეთში გააქვთ. პრემიერმინისტრმა აღნიშნა, რომ ღვინის ექსპორტის მაჩვენებლების ამგვარ ზრდას მთავრობამ "სულ რაღაც რვა წელში" მიაღწია.

"მინდა გითხარათ, რომ საანგარიშო პერიოდში ექსპორტირებული არის 42 მილიონი ბრენდი, რაც 30%-ით აღემატება 2020 წლის მაჩვენებელს და 550%-ით აღემატება 2012 წლის მაჩვენებელს. ამხელა სხვაობაა. ბრენდის ექსპორტით მიღებული შემოსავალი 78 მილიონ დოლარს შეადგენს, 2012 წელს ეს იყო მხოლოდ 20 მილიონი დოლარი. ქართული კომპანიების რაოდენობა, რომლებიც ახორციელებენ ექსპორტს 440-ს აჭარბებს, 2012 წელს ეს იყო სულ რაღაც 100 კომპანიამდე.

ასევე, გეტყვით, რომ ჯამურად ღვინის, ბრენდის, ჭაჭის, საბრენდე სპირტისა და ჩამოსასხმელი ბრენდის ექსპორტის შედეგად მიღებულია 400 მილიონ დოლარამდე შემოსავალი, რაც არის 18%-ით მეტი 2020 წლის მაჩვენებელზე და 142%-ით მეტი არის 2012 წელთან შედარებით.

ეს არის რეალური განსხვავება სულ რაღაც რვა წელში, რომელიც ჩვენი მთავრობის საერთო ძალისხმევით იქნა მიღწეული", — თქვა ღარიბაშვილმა.

ირაკლი ღარიბაშვილს არ უსაუბრია ქვეყანაში არსებული რეკორდულად მაღალი ინფლაციის შესახებ, რომელიც, მათ შორის, საექსპორტოს საქონლის გაძვირებასა და მისი საერთო ღირებულების ზრდას იწვევს.

შეგახსენებთ, რომ 2021 წლის დეკემბერში საქართველოში წლიური ინფლაცია 13,9% იყო — ფასების დონის ზრდის ამაზე მაღალი მაჩვენებელი ბოლოს 2011 წლის მაისში დაფიქსირდა.