დეპუტატი თეონა აქუბარდია აცხადებს, რომ 5-6 ივლისის საქმე დროულად რომ გამოძიებულიყო, ძალადობრივი კონტრაქციის ლიდერები პარტიის შექმნას ვერ შეძლებდნენ. ეს განცხადება მან საპარლამენტო საგამოძიებო კომისიების მნიშვნელობაზე საუბრისას გააკეთა.

"საგამოძიებო კომისია, ვფიქრობ, რომ ერთ-ერთი მძლავრი ინსტრუმენტი არის ოპოზიციის ხელში [...] ვფიქრობ, რომ ჩვენ დრო გავუშვით ხელიდან და მნიშვნელოვანი დრო გავუშვით. თუმცა, სჯობს გვიან, ვიდრე არასდროს. იმიტომ, რომ როდესაც საუბარი არის 5-6 ივლისის საქმის გამოძიებაზე, ჩვენ ყველანი ვთანხმდებით, ალბათ, რომ ამ დღეს იყო იერიში ჩვენს კონსტიტუციაზე მიტანილი და დამოუკიდებელ მედიაზე, კრიტიკული აზრი როგორ იდევნებოდა ამ დღეს ვნახეთ, ეს იყო ძალადობრივი აქტი და ჩვენ მოგვიწოდეს ჩვენმა პარტნიორებმა, რომ გამოგვეძიებინა ეს საკითხი.

ვფიქრობ, რომ ესეც ძალიან მნიშვნელოვანი იყო, იმიტომ, რომ ის ძალა, რომელიც დღეს უკვე პოლიტიკურ პარტიას უწოდებს თავის თავს და დარეგისტრირებულია, მე არ მგონია, რომ მათ შეეძლოთ დარეგისტრირება, რომ ყოფილიყო დროულად ამის გამოძიება", — განაცხადა აქუბარდიამ TV პირველის ეთერში.

ძალადობრივმა, ჰომოფობიურმა და პრორუსულმა ალტ ინფომ პარტია დააფუძნა, რომელსაც კონსერვატიული მოძრაობა უწოდეს. პარტიის სადამფუძნებლო ყრილობა თბილისში, ექსპო ჯორჯიაში გაიმართა. ალტ ინფოს პარტიის ასაკრძალად ოპოზიციის დეპუტატებმა ხელმოწერების შეგროვება დაიწყეს. მათი განცხადებით, ეს პარტია საქართველოს კონსტიტუციას ეწინააღმდეგება.

რა ვიცით Alt-info-ზე

შპს ალტ-ინფო იურიდიულ პირად საქართველოს საჯარო რეესტრში 2019 წლის 28 იანვარს დარეგისტრირდა. მისი მფლობელები შოთა მარტინენკო და ციალა მორგოშია არიან. მარტინენკო ასევე არის არაკომერციული იურიდიული პირის, "ალტერნატივა საქართველოსთვის" საბჭოს წევრიც. ალტერნატივა საქართველოსთვის საბჭოს წევრები ასევე არიან ზურაბ მახარაძე, კონსტანტინე მორგოშია, ირაკლი კიზილაშვილი და გიორგი ქარდავა.

2018 წლის ნოემბერში ალტ-ინფომ განაცხადა, რომ ქმნიდა ინტერნეტტელევიზიას, რათა "ლიბერალურ პროპაგანდას" დაპირისპირებოდა. ისინი ქვეყნის მოვლენებს კონსერვატიულ ჭრილში აშუქებდნენ.

ფაქტჩეკერების ქართულმა ორგანიზაციებმა არაერთხელ დაარეპორტეს ალტ-ინფოს გვერდები მანიპულაციური და ყალბი ინფორმაციის გავრცელების გამო. ალტ-ინფო გამუდმებით აჟღერებს ანტიდასავლურ გზავნილებს და ანტიემიგრანტულ პოლიტიკას მოითხოვს. ის ავრცელებს პრორუსულ ნარატივებსაც, რომლებიც ხშირად კრემლის სტრატეგიულ გზავნილებთან თანხვედრაშია.

2019 წელს ფეისბუქმა ალტ-ინფოსთან დაკავშირებული ქსელი წაშალა, თუმცა მათ ახალი ქსელი შექმნეს და საკუთარი ნარატივის გავრცელება განაგრძეს. 2020 წლის 23 ოქტომბერს Facebook-მა კოორდინირებული არაავთენტური ქცევის გამო Alt-info-სთან დაკავშირებული ქსელი ხელახლა წაშალა, რომელიც 130 აქტივს მოიცავდა. ქსელის მიერ გავრცელებული პოსტები ანტიდასავლური და პარტიზანული შინაარსის იყო.

ამ წმენდის შემდეგაც Alt-info-მ ახალი გვერდები შექმნა, რომელსაც Alt TV დაარქვა და პარალელურად სხვა ქსელების, იუთუბისა და ტელეგრამის ათვისება დაიწყო. ამ ეტაპზეც ფეიბუქზე Alt TV-ს გვერდი დაბლოკილია.