ქართული ოცნების თავმჯდომარე, ირაკლი კობახიძე სახელმწიფო ინსპექტორის შესახებ მმართველი პარტიის მიერ ინიცირებულ კანონპროექტთან დაკავშირებით ირწმუნება, რომ ეს ნიშნავს არა უწყების გაუქმებას, არამედ მისი ორი სამსახურით ჩანაცვლებას. კითხვაზე, არის თუ არა შესაძლო ცვლილება პოლიტიკური საკითხი, კობახიძე ამბობს, რომ — არა. მისი მტკიცებით, ეს წმინდად სამართლებრივი და ინსტიტუციური თემაა.

"სახელმწიფო ინსპექტორის სამსახურის გაუქმებაზე საუბარი არ არის, რეალურად, ერთი სამსახური ჩანაცვლდება ორი სამსახურით. არავითარი ფორმით არ იკვეცება კონპეტენციები, პირიქით, ფართოვდება კიდეც საგამოძიებო ნაწილის უფლება-მოსილებები, თავის დროზეც იყო არაერთი რეკომენდაცია, მათ შორის, იგივე არასამთავრობო ორგანიზაციების, საერთაშორისო პარტნიორების რეკომენდაცია ამასთან დაკავშირებით, რომ ეს ორი ფუნქცია ყოფილიყო ერთმანეთისგან დამოუკიდებელი. ანუ არის განსხვავებული ორი ფუნქცია, რომელიც არის თავმოყრილი ერთ უწყებაში, ერთი ეს არის პერსონალური მონაცემების დაცვა, მეორე — გამოძიება. არანაირი კავშირი ამ ორ ფუნქციას ერთმანეთთან არ აქვს, უფრო მეტიც, არის ინტერესთა კონფლიქტი", — განაცხადა მან იმედის ეთერში.

კობახიძის თქმით, გარდა იმისა, რომ კანონპროექტი სამართლებრივათა და ინსტიტუციურად გამართულია, ის დღეს არსებულ მდგომარეობასაც გააუმჯობესებს.

ქართულ ოცნებას სახელმწიფო ინსპექტორის სამსახურის გაუქმება და მის ბაზაზე ორი ახალი უწყების — სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა სურს. შესაბამისი კანონპროექტი უკვე მომზადებული და ინიცირებულია. როგორც On.ge-ს დოკუმენტის ერთ-ერთმა ავტორმა, გურამ მაჭარაშვილმა განუცხადა კანონპროექტი ორშაბათს, 27 დეკემბერს ბიუროს სხდომაზე იქნება წარდგენილი.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

სახელმწიფო ინსპექტორის სამსახურს ამ პერიოდში არაერთხელ გაუვრცელებია ინფორმაცია სამართალდამცავი ორგანოების თანამშრომლების მიერ ჩადენილი დანაშაულის შესახებ, თუმცა ყველაზე დიდი გამოხმაურება ექსპრეზიდენტ მიხეილ სააკაშვილზე მომზადებულმა დასკვნამ გამოიწვია. დოკუმენტის მიხედვით, იუსტიციის სამინისტრომ პატიმარ მიხეილ სააკაშვილის პერსონალური ინფორმაციის გასაჯაროებით კანონი დაარღვია. უწყებამ კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. აღსანიშნავია, რომ ერთი კვირის წინ, 19 დეკემბერს ქართული ოცნების თავმჯდომარემ, ირაკლი კობახიძემ თქვა, რომ ინსპექტორის დასკვნას არ ეთანხმება. მისი განცხადებით, ექსპრეზიდენტის უფლებები არ შელახულა და როცა საუბარია იმაზე, რომ მოქალაქეებმა პრეზიდენტი იხილეს ასეთ მდგომარეობაში, სააკაშვილი ადამიანებმა მანამდეც ნახეს "სახურავზე კარლსონივით" და "თმებით როგორ ათრევდა უკრაინელი სამართალდამცავი".

სახელმწიფო ინსპექტორის, ლონდა თოლორაია განცხადებით, მისი სამსახურის გაუქმების შესახებ "კონსპირაციულად" დაინიცირებული კანონპროექტის შესახებ მედიიდან შეიტყო. მისი თქმით, ეს მოხდა იმ პირობებში, როცა 9 დეკემბრიდან ცდილობს პარლამენტთან კომუნიკაციას სამსახურის ინსტიტუციური გაძლიერების მიზნით შემუშავებული კანონპროექტის დაინიცირებაზე. თოლორაია აღნიშნავს, რომ ამ კოორდინაციის პროცესში, პარლამენტის წარმომადგენელთა მხრიდან არც ერთი სიტყვა თქმულა გაქუმების ინიციატივაზე.