პარტია გირჩის ლიდერი იაგო ხვიჩია პრეზიდენტ სალომე ზურაბიშვილს შეხვდა. ხვიჩიას თქმით, პოლიტიკური კრიზისის განმუხტვის გზას ის ლაპარაკის დაწყებაში ხედავს. მისივე თქმით, პრეზიდენტს, ზოგადად, ურჩია, რომ შერიგებისთვის შეწყალების ინსტიტუტი გამოიყენოს, თუმცა იქვე აღნიშნა, რომ ამაში ექსპრეზიდენტ მიხეილს სააკაშვილის შეწყალებას არ გულისხმობს. ხვიჩიამ როგორც განაცხადა, რომ სააკაშვილთან დაკავშირებით არ უსაუბრია.

"ლაპარაკის დაწყება იმას ნიშნავს, რომ მართლა იმას ვლაპარაკობთ, რასაც ვფიქრობთ. შეიძლება ჩვენ გვქონდეს განსხვავებული აზრი, მაგრამ მინიმუმ ის მაინც ვიცოდეთ, რომ ერთმანეთს არ ვატყუებთ. ლაპარაკის დაწყება მნიშვნელოვანი ფაქტორია. ეს გვჭირდება იმისთვის, რომ გავიაზროთ მათ შორის წარსულში როგორ ვცხოვრობდით, რა შეცდომები დავუშვით და აწმყოში რა შეცდომებს ვუშვებთ. წარსულის გააზრება აუცილებელია იმისთვის, რომ აწყმოში და მომავალში უკეთესად ვიცხოვროთ", — განაცხადა ხვიჩიამ.

პრეზიდენტმა პოლიტიკურ პარტიებთან შეხვედრები დაიწყო. დღეს ის ოპოზიციის რამდენიმე წარმომადგენელს შეხვდა.

• "ამ ეტაპზე ხდება ინტელექტუალური მოთელვა" — სამადაშვილი ზურაბიშვილს შეხვდა
• "ერთმანეთს მოვუსმინეთ, აზრები გავცვალეთ" — ხატია დეკანოიძე სალომე ზურაბიშვილს შეხვდა

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.