სახელმწიფო კონსილიუმის წევრი ექიმი, ნინო შარაშენიძე აცხადებს, რომ მიხეილ სააკაშვილი პერიოდულად არის სუსტად, თუმცა მისი ლაბორატორიული მაჩვენებლები დამაკმაყოფილებელია და სიცოცხლისთვის საშიში გართულებები არ აღენიშნება.

"გავეცანით პაციენტის ავადმყოფობის მთელ ისტორიას, ერთი კვირის განმავლობაში შესრულებულ ლაბორატორიულ კვლევის შედეგებს, თუმცა ამ კვლევებთან ჩვენ ისედაც გვაქვს ხოლმე კვირის განმავლობაში მთლიანად გარკვეული წვდომა. პაციენტის ლაბორატორიული მაჩვენებლები დამაკმაყოფილებელია. ამ ეტაპზე სიცოცხლისთვის რაიმე საშიში გართულება არ აღენიშნება, აქვს ჰემოგლობინი შემცირებული, პერიოდულად შედარებით მცირდება, მატულობს, თუმცა თავის ძირითადი ქრონიკული დაავადებიდან გამომდინარე, ძალიან მაღალი ჰემოგლობინი ისედაც არასდროს არ აქვს. არ აღენიშნება არცერთი ვიტამინის დეფიციტი, არ აქვს აქტიური ჰემოლიზი.

პერიოდულად არის სუსტად, დღის მეორე ნახევარში ეს სისუსტე გაცილებით უფრო თვალშისაცემია ხოლმე, რაც სავარაუდოდ, მის ემოციურ ლაბილობას უკავშირდება, იღლება ვიზიტორებთან შეხვედრით, იმ ემოციით, რასაც იღებს ტელევიზორიდან და ა.შ. აბსოლუტურად ადეკვატურად, ძალიან ხალისიანად გაგვცა პასუხი ყველა ჩვენს დასმულ კითხვაზე, დავსახეთ შემდგომი მოქმედების ტაქტიკა", — ამბობს ექიმი.

ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.