ეკონომიკის მინისტრის ნათია თურნავას განცხადებით, გუნდში არანაირი დაპირისპირება არ ყოფილა და ჯანდაცვის მინისტრი ამის გამო არ გადამდგარა. მან ჟურნალისტებს უთხრა, რომ ნუ ეძებენ "სკანდალურ კონტექსტს" და აღნიშნა, რომ არ იცის უახლოეს პერიოდში რაიმე სხვა ცვლილებაც თუ იგეგმება.

"არანაირი დაპირისპირება არ ყოფილა და ზოგადად, ჩვენ მთავრობაში საკადრო გადაწყვეტილებების უკან ნუ ეძებთ მედია სკანდალურ კონტექსტს. ეს არის ჩვეულებრივი ამბავი. მე, რა თქმა უნდა, უარვყოფ. არანაირი დაპირისპირება არ ყოფილა. სამთავრობო გადაწყვეტილებები, ასე ვთქვათ სამთავრობო გუნდის შესახებ იღებს პრემიერმინისტრი. ჩემთვის არ არის ცნობილი, რომ უახლოეს პერიოდში რაიმე სხვა იგეგმებოდეს", — თქვა თურნავამ.

ეკატერინე ტიკარაძემ ჯანდაცვის მინისტრის თანამდებობა 9 დეკემბერს დატოვა. ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ საქმიანობის პარტიის პოლიტსაბჭოში გაგრძელება მიიჩნია სწორად. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

ეკატერინე ტიკარაძისა და პრემიერმინისტრ ირაკლი ღარიბაშვილის შესაძლო დაპირისპირებაზე მედია რამდენიმე დღეა აქტიურად საუბრობს. ამბობდნენ, რომ დაპირისპირება კორონავირუსის მართვაზე განსხვავებულმა ხედვებმა გამოწივია. ამ თემაზე ჯანდაცვის მინისტრს რამდენჯერმე ჰკითხეს, თუმცა ის პასუხს თავს ირიდებდა. გარდა ამისა, მინისტრს ეკითხებოდნენ, იყო თუ არა დაპირისპირების და კამათის მიზეზი მწვანე პასპორტების საკითხი, რაზეც ის ამბობდა, რომ არა დაპირისპირება, არამედ განხილვა ჰქონდათ.

ტიკარაძემ რამდენჯერმე თქვა ისიც, რომ არ ემხრობოდა მთავრობის დაწესებულ უვადო მწვანე პასპორტის იდეას და როგორც ჯანდაცვის სფეროს წარმომადგენელი, ვირუსის მართვის უფრო მკაცრი ზომების მომხრე იყო.