კულტურის მინისტრის, თეა წულუკიანის განცხადებით, როდესაც ნაციონალური მოძრაობა იყო ხელისუფლებაში საზოგადოებას "ჩარეცხილებად და თავისიანებად" ხლეჩდნენ. მისი თქმით, არ სჯერა, როდესაც ისინი ეროვნულ შერიგებაზე საუბრობენ, რადგან "მოირგეს კრავის ტყავები".

"რაც შეეხება ბატონი მიხეილ სააკაშვილის თუ ჩვენი სხვა ოპონენტების გულწრფელობას იმასთან დაკავშირებით, რომ მათ თითქოს სურთ ეროვნული თანხმობა, მე პირადად ამის არ მჯერა. იმიტომ, რომ როდესაც იყვნენ ისინი ხელისუფლებაში, ყოველთვის ხლეჩდნენ საზოგადოებას, ყოველთვის ყოფდნენ საზოგადოებას — ჩარეცხილებად და თავისიანებად და ჩვენ დღესაც, სამწუხაროდ, ვიმკით ამის შედეგს. დღეს მათ ჩაიცვეს, მოიხურეს კრავის ტყავები და თავს გვაჩვენებენ, თითქოს უნდათ ჰარმონია და თანხმობა, არადა არიან პირველი, მე ვიტყოდი — ერთადერთი წყარო იმ საშინელი პოლარიზაციის, რომელიც დღეს ქვეყანაში არსებობს", — ამბობს წულუკიანი.

6 დეკემბერს მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგებას სთავაზობს. მისი თქმით, "ეს ყველასთვის საუკეთესო გამოსავალია".