ქართული ოცნების თავმჯდომარე, ირაკლი კობახიძე ამტკიცებს, რომ მე-9 კლასის ისტორიის სახელმძღვანელოებში გადმოცემულია ფაქტები, თანაც ლაკონურად და "მაქსიმალურად მოკრძალებულად". მისი თქმით, წიგნებს მხოლოდ იმის შესახებ მითითება აკლია, რომ მიხეილ სააკაშვილის პრეზიდენტობისას საქართველოში ჩამოყალიბდა "უმძიმესი ავტორიტარული რეჟიმი".

"ერთი რამ ნამდვილად აკლია ამ სახელმძღვანელოს — აკლია მითითება იმასთან დაკავშირებით, რომ სააკაშვილის რეჟიმის პირობებში, 9 წლის განმავლობაში, საქართველოში იყო ჩამოყალიბებული უმძიმესი ავტორიტარული რეჟიმი, რომლის შედეგები იყო ადამიანის უფლებების სისტემური ხელყოფა, ადამიანების წამება, ადამიანების მიმართ არაადამიანური მოპყრობა, ბიზნესის რეკეტი, ადამიანებზე ზეწოლა და ა.შ. ეს ყველაფერი ნამდვილად აკლია ამ სახელმძღვანელოს და მე ვფიქრობ, რომ ეს ყველაფერი მომავალში სახელმძღვანელოში არის შესატანი.

ასევე, აკლია მითითება იმასთან დაკავშირებით, რომ მიხეილ სააკაშვილი არის კრიმინალი პრეზიდენტი, რომლის დანაშაული აღიარებულ იქნა ქართული მართლმსაჯულების მიერ. მე ვფიქრობ, ასეთი ჩანაწერები ამ სახელმძღვანელოს აუცილებლად უნდა დაემატოს. ეს იქნება მარტივი ფაქტების კონსტატაცია", — განაცხადა ირაკლი კობახიძემ.

რაც შეეხება ჩანაწერებს ბიძინა ივანიშვილის მეცენატობისა და ქველმოქმედების შესახებ, კობახიძე ამასაც "უმარტივესი ფაქტის კონსტანტაციას" უწოდებს.

განათლების სამინისტროს მიერ გრიფირებულ ისტორიის სახელმძღვანელოებში ყოფილი პრემიერმინისტრის, ბიძინა ივანიშვილის ბიოგრაფია შეიტანეს. გარდა ამისა, სახელმძღვანელოებში საუბარია ვარდების რევოლუციასა და რუსეთ-საქართველოს ომის პერიოდზე. წიგნებში 2012 წლის მოვლენები დადებითადაა შეფასებული და წერია, რომ ხელისუფლების ცვლილების მიუხედავად ევროპული კურსი არათუ შეიცვალა, არამედ, უფრო მეტად გაღრმავდა.

უფრო კონკრეტულად, დიოგენეს გამოცემულ წიგნში ივანიშვილი ცნობილ ქველმოქმედად და მეცენატადაა მოხსენიებული. ვარდების რევოლუციის შესახებ მხოლოდ ის წერია, რომ 2003 წლის საპარლამენტო არჩევნების შემდეგ მოსახლეობა ქუჩაში გამოვიდა, რის შემდეგაც ედუარდ შევარდნაძე გადადგა, ხელისუფლებაში ნაციონალური მოძრაობა მოვიდა და ეს მოვლენა უახლეს ისტორიაში ვარდების რევოლუციის სახელით შევიდა. ამ მოჰყვება ერთი წინადადება მიხეილ სააკაშვილის შესახებ: "2004 წლის იანვრიდან საქართველოს პრეზიდენტად საქართველოს მოსახლეობამ მიხეილ სააკაშვილი აირჩია".

გამომცემლობა ლოგოსპრესმა მოსწავლეებს ბიძინა ივანიშვილზე უფრო მეტი ბიოგრაფიული ცნობა შესთავაზა და პოლიტიკური საქმიანობის გარდა, მისი ბიზნეს საქმიანობაც მიმოიხილა. ივანიშვილი, ბიზნესმენად და პოლიტიკოსად, ასევე, ქველმოქმედადაა მოხსენიებული და აღნიშნულია, რომ პოლიტიკაში მოსვლამდე ის კულტურული მემკვიდრეობის დაცვა-აღდგენის პროექტებსა და სახელმწიფო ინსტიტუტებს აფინანსებდა. წიგნში წლების მიხედვითაა ჩამოთვლილი, თუ რით იყო იგი ხელისუფლებაში მოსვლამდე დაკავებული, ტექსტში მის დაარსებულ ბანკები, მათ შორის, როსისკიი კრედიტი და ქართუ ბანკიც ნახსენებია.

ბიძინა ივანიშვილის გარდა, სახელმძღვანელოში მიხეილ სააკაშვილზეცაა საუბარი. ნათქვამია, რომ ის 1995 წლიდან პარლამენტის წევრი, შემდეგ იუსტიციის მინისტრი, შემდეგ თბილისის საკრებულოს თავმჯდომარე, ხოლო 2003-2013 წლებში ქვეყნის პრეზიდენტი იყო. ასევე, აღნიშნულია, რომ 2015 წლიდან პოლიტიკურად უკრაინაში საქმიანობს.

გაიგე მეტი: