არასამთავრობო ორგანიზაციები ქართული ოცნების თავმჯდომარის, ირაკლი კობახიძის განცხადებასთან დაკავშირებით ამბობენ, რომ მმართველი პარტიის მიერ საერთაშორისო, ადგილობრივი პარტნიორებისა საზოგადოების წინაშე დადებული პირობა, რომელიც ქვეყანაში დემოკრატიის დონის გაუმჯობესებას ემსახურება, აუცილებლად უნდა შესრულდეს, რადგან ეს მმართველი ძალის უპირველეს ვალდებულებას წარმოადგენს.

"ხელმომწერი ორგანიზაციები მიიჩნევენ, რომ მმართველი პარტიის მიერ, საერთაშორისო, ადგილობრივი პარტნიორებისა და საზოგადოების წინაშე დადებული პირობა, რომელიც ქვეყანაში დემოკრატიის დონის გაუმჯობესებას ემსახურება, აუცილებლად უნდა შესრულდეს, რადგან ეს მმართველი ძალის უპირველეს ვალდებულებას წარმოადგენს. სრულად პროპორციული სისტემის დაუყოვნებლივ ამოქმედება და საარჩევნო ბარიერის შემცირება არა მხოლოდ ოპოზიციის, არამედ ქვეყნის ინტერესებშია და ხელს შეუწყობს საკანონმდებლო ორგანოში სხვადასხვა ჯგუფების ინტერესების ადეკვატურად ასახვასა და პლურალიზმის განმტკიცებას", — აღნიშნულია განცხადებაში.

მათივე თქმით, საკონსტიტუციო ცვლილებები პირველი მოსმენით ერთხმად ოპოზიციური საპარლამენტო პარტიების მხარდაჭერითაცაა მიღებული, რაც ქართულ პოლიტიკურ სივრცეში პარტიების შეთანხმებისა და თანამშრომლობის იშვიათ, მისასალმებელ მაგალითს წარმოადგენს.

"რეფორმის გაგრძელებაზე უარი, ამ მხრივაც დააზიანებს ისედაც პოლარიზებულ პოლიტიკურ გარემოს და ეჭვქვეშ დააყენებს მმართველი პარტიის სანდოობას", — ამბობენ ისინი.

ხელმომწერი ორგანიზაციები:

• სამართლიანი არჩევნებისა და დემოკრატიის საერთაშორისო საზოგადოება (ISFED);
• საერთაშორისო გამჭვირვალობა — საქართველო (TI);
• ლიბერალური აკადემია;
• საზოგადოება და ბანკები;
• ეკონომიკური პოლიტიკის კვლევითი ცენტრი (EPRC);
• საქართველოს ახალგაზრდა იურისტთა ასოციაცია (GYLA);
• საქართველოს დემოკრატიული ინიციატივა (GDI);
• ღია საზოგადოების ფონდი (OSGF);
• საქართველოს ატლანტიკური საბჭო (ACG);
• დემოკრატიისა და უსაფრთხო განვითარების ინსტიტუტი (IDSD);
• საქართველოს რეფორმების ასოციაცია (GRASS);
• საქართველოს სტრატეგიისა და საერთაშორისო ურთიერთობების კვლევის; ფონდი(რონდელის ფონდი) – GFSIS;
• სოციალური სამართლიანობის ცენტრი (ყოფილი EMC);
• მედიის განვითარების ფონდი (MDF);
• ინფორმაციის თავისუფლების განვითარების ინსტიტუტი (IDFI);
• ადამიანის უფლებათა ცენტრი;
• კვლევითი ჟურნალისტიკის და ეკონომიკური ანალიზის ცენტრი;
• ტოლერანტობის და მრავალფეროვნების ინსტიტუტი (TDI).

ქართული ოცნების თავმჯდომარემ, ირაკლი კობახიძემ 30 ნოემბერს განაცხადა, რომ 2%-იანი საარჩევნო ბარიერი მათ "კეთილ ნებაზე იქნება დამოკიდებული". მან, ასევე, აღნიშნა, რომ საკონსტიტუციო ცვლილებების მიღების არავითარი აუცილებლობა არ არსებობს.

შარლ მიშელის შეთანხმების საფუძველზე შემუშავებული კანონპროექტი გულისხმობდა, საკონსტიტუციო ცვლილებებს საარჩევნო ბარიერზე, ფრაქციების შექმნასა და გენერალური პროკურორის არჩევის წესის ცვლილებას. პროექტის მიხევდით, მომავალ ორ საპარლამენტო არჩევნებში ბარიერი ბუნებრივსა და 2%-ს შორის უნდა ყოფილიყო, ხოლო ფრაქციის ჩამოსაყალიბებლად საკმარისი უნდა ყოფილიყო მინიმუმ 4 წევრი, მათ შორის, მაჟორიტარები.

ქართულმა ოცნებამ შარლ მიშელის შეთანხმება ანულირებულად გამოაცხადა. ირაკლი კობახიძემ პარტიის პოლიტსაბჭოსა და უმრავლესობის სხდომის შემდეგ გამართულ ბრიფინგზე გამოაცხადა, რომ შეთანხმებას მხოლოდ ისინი ასრულებდნენ კეთილსინდისიერად, რაც არასწორია. მათი აზრით, 100 დღეში თავი ამოწურა დოკუმენტმა, რომლის გამოც შარლ მიშელი და კრისტიან დანიელსონი საქართველოს არაერთხელ ეწვივნენ და რომლის მიღებაშიც არაერთი ქვეყნის ელჩი იყო ჩართული.

მიშელის დოკუმენტში ასევე გათვალისწინებული იყო, რომ თუ ქართული ოცნება არჩევნებზე 43%-იან ბარიერს ვერ გადალახავდა, რიგგარეშე არჩევნები უნდა დანიშნულიყო.