სომხეთში საარჩევნო დღე ადგილობრივი დროით 20:00 საათზე დასრულდა. ხმების დათვლა დაწყებულია.

სომხური მედიის ცნობით, 2 587 706 ამომრჩევლიდან ხმა 1 574 947 მისცა, შესაბამისად, აქტივობა 60,86% იყო.

სომხეთის საპარლამენტო არჩევნებში ხუთი პოლიტიკური პარტია და ოთხი ბლოკი იღებს მონაწილეობას. პარლამენტში მოსახვედრად პარტიებმა 5-პროცენტიანი, ბლოკებმა კი 7-პროცენტიანი საარჩევნო ბარიერი უნდა გადალახონ.

ეგზიტ პოლის მიხედვით, პარლამენტში 4 პოლიტიკური ძალა შედის - სომხეთის რესპუბლიკური პარტია, წარუკიანის ბლოკი, ალიანსი იელქი, სომხეთის რევოლუციური ფედერაცია - დაშნაკცუთიუნი. ეგზიტ პოლი BS/The Gallup Organization-მა სომხეთის სოციოლოგთა ასოციაციასთან ერთად ჩაატარა. კონკრეტულად პროცენტული მაჩვენებელი ასე გადანაწილდა:

  • სომხეთის რესპუბლიკური პარტია - ხმების 46%;
  • წარუკიანის ბლოკი - ხმების 25%;
  • ალიანსი იელქი - ხმების 10%;
  • სომხეთის რევოლუციური ფედერაცია - დაშნაკცუთიუნი - ხმების 5%;
  • სომხური აღორძინება - ხმების 4%;
  • ოგანიანი-რაფი-ოსკანიანი - ხმების 3%;
  • სომხეთის ეროვნული კონგრესი - სომხეთის ეროვნული პარტია - ხმების 3%;
  • თავისუფალი დემოკრატები - ხმების 2%;
  • კომუნისტური პარტია - ხმების 2%.

რადიო თავისუფლების სომხური სამსახურის ცნობით, ეგზიტ პოლი მთელი ქვეყნის მასშტაბით 125 საარჩევნო უბანზე და მასში მონაწილეობა 30 ათასმა ადამიანმა მიიღო.