ექსპრეზიდენტის ადვოკატის, ბექა ბასილაიას განცხადებით, ხვალ, 15 ნოემბერს 11 საათზე ე.წ. პიჯაკების საქმეზე სასამართლო სხდომაა ჩანიშნული, რომელზეც სააკაშვილს დასწრება სურს. მისი თქმით, სასამართლომ პარასკევს გაუგზავნა პენიტენციურ სამსახურს მოთხოვნა, ამიტომ მისი არგადაყვანის სამართლებრივი და პროცედურული საფუძველი არ არსებობს.

"სისხლის სამართლის საპროცესო კოდექსის, საქართველოს კონსტიტუციის და ადამიანის უფლებათა და ძირითად თავისუფლებათა დაცვის ევროპული კონვენციის თანახმად სააკაშვილს აქვს უფლება, უშუალოდ მიიღოს პროცესში მონაწილეობა, ხოლო სახელმწიფო ვალდებულია, სააკაშვილი წარადგინოს სასამართლოს წინაშე. ჯანმრთელობის მდგომარეობა არის, რა თქმა უნდა, ძალიან რთული და მძიმე, მაგრამ მიხეილ სააკაშვილი აცხადებს მათ შორის დღესაც, რომ მოიკრებს მაქსიმალურად ძალ-ღონეს და დაესწრება ამ პროცესს, მთავარია უზრუნველყონ მისი გადაყვანა.

როდესაც სააკაშვილი აცხადებს, რომ სურს პროცესს დაესწროს, პენიტენციურ სამსახურს მისი არგადაყვანის არანაირი სამართლებრივი საფუძველი არ არსებობს", — განაცხადა მან.

ბასილაიას თქმით, თუ სახელმწიფო ისე მოიქცევა, როგორც წინა პროცესზე და მას გადაყვანაზე უარს ეტყვის, ეს იქნება იმის ლუსტრაცია, თუ როგორ ეშინიათ საზოგადოების წინაშე სააკაშვილი პირდაპირ გამოჩენის.

10 ნოემბერს პენიტენციურმა სამსახურმა მიხეილ სააკაშვილს სასამართლო სხდომაზე დასწრებაზე უარი უთხრა. ადვოკატებისა და თავად სააკაშვილის მოთხოვნა იყო, რომ ის პროცესს დასწრებოდა, იუსტიციის მინისტრის, რატი ბრეგაძის რეკომენდაცია კი იყო, რომ პროცესი პენიტენციურ დაწესებულებაში ჩატარებულიყო.

უწყებამ ამის მიზეზად ის დაასახელა, რომ შესაძლოა სასამართლო დარბაზში ესკორტირებისას მოხდეს დესტრუქციული ხასიათის ქმედება. მათივე თქმით, სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება კი წარმოადგენს დამატებით რისკს მისი ჯანმრთელობისთვის.