ნაციონალური მოძრაობის თავმჯდომარის, ნიკა მელიას განცხადებით, ხვალ, 15 ნოემბერს თბილისის ორივე სანაპიროზე გზას გადაკეტავენ. მან აქციები 15:00 და 17:00 საათზე დააანონსა და განაცხადა, რომ შეკრების ზუსტ ადგილს საღამოს იტყვის.

"მე მესმის, რომ ეს გარკვეულ დისკომფორტს შეუქმნის მოქალაქეებს, მაგრამ ეს არის ძლიერი გამაფრთხილებელი სიგნალი რეჟიმისთვის, რომ არაძალადობრივი საპროტესტო მოძრაობა ყოველ დღე უფრო მწვავე გახდება!" — წერს ის.

მელია აცხადებს, რომ სახლში ჯდომის დრო აღარ არის, თუ ხალხს უნდა, ქვეყანას აარიდოს უბედურება და შემდგომში მრავალწლიანი სამოქალაქო გახლეჩა.

"გთხოვთ ყველას, ვისაც ხვალ გაქვთ გადაუდებელი საქმე, არ დაგეგმოთ საავტომობილო გზების გამოყენება ამ საათებში! რეჟიმი უნდა ვარყიოთ, სანამ არ ჩამოინგრევა. შემოუერთდით სამართლიან ბრძოლას" — წერს ის.

ნაციონალური მოძრაობის აქციები, რომლებიც 14 ნოემბრისთვის იყო დაგეგმილი გაუქმდა. პარტიაში On.ge-ს განუცხადეს, რომ სხვა ნაბიჯები გადაიდგმებოდა, რომელზეც ინფორმაციას მოგვიანებით გაავრცელებდნენ.

რაც შეეხება მოძრაობა სირცხვილიას, აქტივისტები აცხადებენ, რომ პარლამენტთან 19:00 საათზე დაგეგმილი აქცია გაიმართება.