ლელოს განცხადებით, დროას ლიდერის, ელენე ხოშტარიას მოწამვლის სავარაუდო "სცენარზე" ქართული ოცნების თავმჯდომარის, ირაკლი კობახიძის განცხადება აბსურდული იყო. თუმცა, მათივე თქმით, ამის მიუხედავად, შესაბამისი უწყებები ვალდებულნი არიან დანაშაულის შესახებ ინფორმაციის მიღების შემთხვევაში დაუყოვნებლივ დაიწყონ გამოძიება.

"მივმართავთ საქართველოს გენერალურ პროკურორს სისხლის სამართლის საპროცესო კოდექსის იმპერატიულ მოთხოვნათა შესაბამისად დაუყოვნებლივ დაიწყოს გამოძიება პოლიტიკური გაერთიანება ქართული ოცნების თავმჯდომარის, ირაკლი კობახიძის განცხადებასთან დაკავშირებით.

წინააღმდეგ შემთხვევაში, ჩაითვლება, რომ ეს ყველაფერი არის მორიგი მძიმე პოლიტიკური სპეკულაცია და მმართველი პარტიის მხრიდან მხოლოდ და მხოლოდ საზოგადოებაში კიდევ უფრო მეტი შფოთის და დაძაბულობის შემოტანა", — განაცხადა მან.

როგორც ლელოში აღნიშნავენ, პროკურატურის მხრიდან გამოძიების არდაწყების შემთხვევაში, ეს იქნება კიდევ ერთი პირდაპირი აღიარება იმისა, რომ ის ემსახურება მმართველი პარტიის პოლიტიკურ ინტერესებს.

ქართული ოცნების თავმჯდომარის, ირაკლი კობახიძის მტკიცებით, მათ მიაწოდეს ინფორმაცია, რომ გუშინ ერთ-ერთ თათბირზე ელენე ხოშტარიას მოწამვლის სცენარი განიხილეს. საპასუხოდ ხოშტარიამ განაცხადა, რომ ეს არაადეკვატურ და არარელევანტურ საკითხზე ყურადღების გადატანის მცდელობაა.

ელენე ხოშტარია საკანონმდებლო ორგანოში მე-7 დღეა შიმშილობს. მისი მთავარი მოთხოვნა, ექსპრეზიდენტი მიხეილ სააკაშვილი სამოქალაქო კლინიკაში გადაყვანაა. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დღეს, 9 ნოემბერს მან განაცხადა, თუ მის სიცოცხლეს საფრთხე შეექმნება, მედიკამენტებს მიიღებს, თუმცა შიმშილობის შეწყვეტას არც კი განიხილავს.

ის 7 და 8 ნოემბერს შეუძლოდ გახდა და სასწრაფო დახმარების გამოძახება გახდა საჭირო. სასწრაფოს ექიმის ინფორმაციით, მას დაუვარდა წნევა და დაკარგა გონება.