პრემიერმინისტრი ირაკლი ღარიბაშვილი ექსპრეზიდენტ მიხეილ სააკაშვილის სამოქალაქო კლინიკაში არგადაყვანასთან დაკავშირებით დასმულ კითხვაზე განაცხადა, რომ მან ამ საკითხზე საუბარი შეწყვიტა. ღარიბაშვილს თქმით, სააკაშვილთან დაკავშირებულ ყველა კითხვას პასუხს პენიტენციური სამსახური და იუსტიციის სამინისტრო გასცემს.

"მე ამ თემაზე საუბარი შევწყვიტე. ეს არ არის ჩემი სალარაკო საკითხი და თემა, ვინაიდან პატიმრებზე განცხადებებს პენიტენციური სამსახური აკეთებს, იუსტიციის სამინისტრო. თქვენ გყავთ მინისტრი ბრეგაძე, რომელსაც შეგიძლიათ ნებისმიერი შეკითხვა დაუსვათ, ასევე, არსებობს პენიტენციური სამსახური. მათ მიმართეთ ნებისმიერი კითხვით და გაგცემენ აბსოლუტურად ამომწურავ პასუხებს", — განაცხადა ღარიბაშვილმა.

აღსანიშნია, რომ არჩევნებამდე პრემიერმინისტრი მიხეილ სააკაშვილზე ხშირად საუბრობდა და მას დესტაბილიზაციის მოწყობაში ადანაშაულებდა. თუმცა, ამასთან აცხადებდა, რომ არჩევნების შემდეგ სააკაშვილზე აღარ ილაპარაკებდა, რადგან მასზე ბევრი განცხადებები გააკეთეს.

სააკაშვილი უკვე 39-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი კი განმარტავენ, რომ ეს არ არის საკვები და არის დანამატი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძემ გაავრცელა, როცა თქვა, რომ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. 6 ნოემბერს ამ თემაზე სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

• სააკაშვილმა გვითხრა, რომ საკვები დანამატის მიღებაში პენიტენციური სამსახურის სამედიცინო დეპარტამენტის ხელმძღვანელმა დაარწმუნა — ომბუდსმენის მოადგილე

აღსანიშნავია, რომ 5 ნოემბერს სახელმწიფო ინსპექტორის სამსახურმაც გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს, კადრების გავრცელების შემდეგ კი უწყებამ განაცხადა, რომ მათი მოპოვებისა და გავრცელების კანონიერებას შეისწავლის და კიდევ ერთხელ ისაუბრა პირადი ცხოვრების ხელშეუხებლობის დაცვის მნიშვნელობაზე.

თავად სააკაშვილი კადრების გამოქვეყნებას სამარცხვინოს და დანაშაულებრივს უწოდებს. თუმცა, მისივე თქმით, ვიდეოს გავრცელებით მას ვერაფერი დააკლეს, ხალხი დარწმუნდა, რომ შიმშილობს და "საუკეთესო ფორმაში არ იმყოფება". ის განმარტავს, რომ კადრებში ჩანს, როგორ იღებს დანამატებს სასიცოცხლო მაჩვენებლების დასარეგულირებლად, რაც მანამდეც იყო ცნობილი.