ნაციონალური მოძრაობის წევრი, ლევან ხაბეიშვილი პენიტენციური სამსახურის მიერ ექსპრეზიდენტის კადრების გავრცელებას აკრიტიკებს და რუსული პროპაგანდის გამოვლინებად აფასებს.

"პრეზიდენტ სააკაშვილს ეტყობა რამდენიმე ათეული კილოგრამის კლება და სისუსტე. პატიმარი იღებს ექიმის დანიშნულებას შესაბამის ოთახში და არა საკვებს მის საკანში.

როგორი გულისამრევები არიან რუსები და მათი ქართული გაგრძელება, რადგან მსგავსი დისკუსია გახსნეს. მიზანმიმართულად, რუსულ პროპაგანდისტულად უნდათ გავიდნენ ფონს და ფიზიკურად გაანადგურონ სააკაშვილი", — წერს ის ფეისბუქგვერდზე.

ის ყველას მაგივრად ბოდიშს უხდის სააკაშვილს და ამბობს, რომ რცხვენია ადამიანების, რომლებიც პრეზიდენტის შიმშილობაზე და ფიზიკურ განადგურებაზე ქირქილებენ.

სააკაშვილი უკვე 38-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა.

ეს ინფორმაცია მანამდე, 5 ნოემბერს იუსტიციის მინისტრმა, რატი ბრეგაძე გაავრცელა, როცა თქვა, რომ სააკაშვილი გარკვეული დროის შემდეგ ფაფებისა და ნატურალური წვენების მიღებას დათანხმდა. 6 ნოემბერს ამ თემაზე სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა. მიღებული ინფორმაციის საფუძველზე ომბუდსმენი აცხადებდა, რომ სააკაშვილი პირველი ოქტომბრის შემდეგ უწყვეტად შიმშილობს და საკვებს არ იღებს.

• სააკაშვილმა გვითხრა, რომ საკვები დანამატის მიღებაში პენიტენციური სამსახურის სამედიცინო დეპარტამენტის ხელმძღვანელმა დაარწმუნა — ომბუდსმენის მოადგილე

აღსანიშნავია, რომ 5 ნოემბერს სახელმწიფო ინსპექტორის სამსახურმაც გაავრცელა განცხადება, სადაც ნათქვამი იყო, რომ მნიშვნელოვანია დაცული იყოს მოშიმშილე თავისუფლებააღკვეთილი პირის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს უწყების მიერ კადრების გავრცელების შემდეგ კი უწყებამ განაცხადა, რომ მათი მოპოვებისა და გავრცელების კანონიერებას შეისწავლის და კიდევ ერთხელ ისაუბრა პირადი ცხოვრების ხელშეუხებლობის დაცვა.

თავად სააკაშვილი კადრების გამოქვეყნებას სამარცხვინოს და დანაშაულებრივს უწოდებს. თუმცა, მისივე თქმით, ვიდეოს გავრცელებით მას ვერაფერი დააკლეს, ხალხი დარწმუნდა, რომ შიმშილობს და "საუკეთესო ფორმაში არ იმყოფება". ის განმარტავს, რომ კადრებში ჩანს, როგორ იღებს დანამატებს სასიცოცხლო მაჩვენებლების დასარეგულირებლად, რაც მანამდეც იყო ცნობილი.

ამავე თემაზე:

• კადრების გასაჯაროებით რატი ბრეგაძემ და პენიტენციურმა სამსახურმა ჩაიდინეს სისხლის სამართლის დანაშაული — ბასილაია
• პენიტენციურის მიერ კადრების გასაჯაროება უხეში დარღვევაა, ემსახურებოდა პოლიტიკურ ინტერესს — მარიკაშვილი