ოკუპირებული აფხაზეთის დრამატულ თეატრთან ომის ვეტერანები და სოფელ აძიუბჟას მცხოვრებლები არიან შეკრებილები, რომლებიც დე ფაქტო შინაგან საქმეთა მინისტრ დიმიტრი დბარის გადადგომას მოითხოვენ. პარალელურად, ე.წ. პრეზიდენტის ადმინისტრაციასთან დე ფაქტო ხელისუფლების მხარდამჭერების, პოლიციელებისა და სხვა საჯარო მოხელეების აქცია მიმდინარეობს.

აფსნიპრესის ცნობით, აქციის მონაწილეები აღშფოთებას გამოთქვამენ იმის გამო, რომ დე ფაქტო პრეზიდენტმა, ასლან ბჟანიამ ე.წ. შს მინისტრი სამსახურებრივი მოვალეობიდან მხოლოდ დროებით გადააყენა, ხოლო 2 ნოემბერს აღადგინა.

დბარის გადადგომას სექტემბერში მომხდარი ინციდენტის გამო ითხოვენ. 30 სექტემბერს, როცა ოკუპირებულ რეგიონში გამარჯვების დღეს აღნიშნავდნენ, ე.წ. მილიციის თანამშრომლები და ვეტერანთა ჯგუფი ერთმანეთს დაუპირისპირდა. ინციდენტი დე ფაქტო დეპუტატ ჰარი კოკაიას მიერ ჰაერში საზეიმო გასროლით დაიწყო.

კოკაია სოფელ აძიუბჟიდან თანასოფლელებთან და აფხაზეთის ომის ვეტერანებთან ერთად, სოხუმის სანაპიროზე ერთ-ერთ რესტორანში ე.წ. გამარჯვების დღეს აღნიშნავდა.

აღმოჩნდა, რომ ამ დროს, გასროლის ადგილიდან რამდენიმე მეტრში, მეორე რესტორან დოლჩე ვიტაში, ოკუპირებული აფხაზეთისა და ოკუპირებული ცხინვალის რეგიონის ე.წ. პრეზიდენტები, ასლან ბჟანია და ანატოლი ბიბილოვიც ქეიფობდნენ.

გასროლიდან მალევე ადგილზე დე ფაქტო შს მინისტრი, დმიტრი დბარი და სპეცრაზმი გამოცხადდა.

დბარი ამბობს, რომ დეპუტატი არაფხიზელ მდგომარეობაში იმყოფებოდა და იარაღის ჩაბარება სთხოვა, რასაც კოკაია არ დათანხმდა. ამის შემდეგ მისთვის იარაღის წართმევა მილიციელებმა ძალით სცადეს, რა დროსაც კოკაიასა და რამდენიმე ვეტერანს სცემეს.

ამის გამო მეორე დღეს სოფელ აძიუჟბის მცხოვრებლებმა სოხუმში აქცია მოაწყვეს და "გამოუსწორებელი შედეგების თავიდან ასაცილებლად" ცემაში მონაწილე დბარის თანამდებობიდან დაუყოვნებლივ გადაყენება მოითხოვეს. მოიწვიეს პარლამენტის საგანგებო სხდომაც, თუმცა მოთხოვნამ საკამარისი ხმების რაოდენობა ვერ მოაგროვა.