ასაკის მიუხედავად, გაერთიანებული სამეფოს დედოფალი ელიზაბეთ II, თანამედროვეობის ნამდვილი ვარსკვლავია. მისი წარმომავლობიდან გამომდინარე, ცხადია, იგი ხშირად ექცევა მედიის ყურადღების ცენტრში, თუმცა, თავისი ცხოვრების სტილით მაინც ყოველ ჯერზე ახერხებს სხვების გაოცებას.

ამჯერად, 95 წლის მონარქმა, რომელიც ექიმების მეთვალყურეობის ქვეშ იმყოფება, მზის სათვალე და თავსაფარი მოირგო და უინძორების რეზიდენციის გარშემო სასეირნოდ მანქანით წავიდა. საჭესთან მჯდარი დედოფალი მალევე მოხვდა ფოტოკამერების ობიექტივში და ინტერნეტსივრცეც არხეინად მოსეირნე მონარქის სურათებმა მოიცვა. მწვანე Jaguar-ით, რომელსაც ის ატარებდა, ელიზაბეთ II-ს, როგორც წესი, თავისი ძაღლები მიჰყავს ხოლმე სასეირნოდ.

ფოტო: Daniel Leal-Olivas / AFP / Getty Images

რამდენიმე დღის წინ, დედოფალ ელიზაბეთს გლაზგოში მიმდინარე კლიმატის ცვლილების სამიტზე ვიზიტიც კი გააუქმებინეს და ორი კვირით დასვენება ურჩიეს. წინა კვირას ასევე ცნობილი გახდა, რომ მონარქი ვერც ბრიტანეთის სამეფო ლეგიონის ხსოვნის ფესტივალს დაესწრებოდა.

ოფიციალური ვიზიტების გაუქმების მიუხედავად, იგი უინძორების სასახლეში მსუბუქ საქმეებს მაინც აკეთებს. ბუკინგემის სასახლეს დედოფლის ჯანმრთელობის მდგომარეობასთან დაკავშირებული დეტალები არ გაუმხელია, მხოლოდ განცხადა, რომ იგი "კარგ განწყობაზეა". ამას პრემიერმინისტრმა ბორის ჯონსონმაც დაამატა, რომ ელიზაბეთ II "მშვენიერ ფორმაშია".

დედოფლის გადაღლის მიზეზი, სავარაუდოდ, შეხვედრებით დატვირთული გრაფიკი გახდა. და თუმცაღა იგი კლიმატის ცვლილების სამიტს ვერ დაესწრება, დელეგატებისათვის ვიდეოშეტყობინება მაინც ჩაწერა. ამის მიუხედავად, ღონისძიებაზე პრინცი ჩარლზი, კორნუოლის ჰერცოგინია კამილა, კემბრიჯიც ჰერცოგი და ჰერცოგინია უილიამი და ქეთრინი მივლენ.