ქუთაისში ექსპრეზიდენტი მიხეილ სააკაშვილის მხარდამჭერ აქციაზე აქტივისტები დააკავეს. აქცია ექსპრეზიდენტის გათავისუფლების მოთხოვნით დაგეგმილი მსვლელობის მონაწილეებმა გამართეს.

"გავაპროტესტეთ ქუთაისის მერიასთან მიხეილ სააკაშვილის თავისუფლება, ვაპირებდით, რომ სტენსილებით გაგვეკეთებინა წარწერა, რის საშუალებაც პოლიციამ არ მოგვცა. მოწოდების შემდეგ ჩვენ დავემორჩილეთ მათ და წარწერა არ გაგვიკეთებია, მაგრამ მიუხედავად ამისა, მათ მაინც გადაწყვიტეს ჩვენი აქტივისტები დაეკავებინათ.

ეს არის მარტივი მიზეზის გამო, იმიტომ, რომ ეს პროტესტი შეჩერდეს. დღეს არის მე-10 დღე. მივემართებით რუსთავის რუსულ ციხესთან, ვაპროტესტებთ მიხეილ სააკაშვილის პატიმრობას და შესაბამისად, ხელისუფლებას ეს ძალიან აწუხებდა ქვეყანაში მიმდინარე 10-დღიანი მშვიდობიანი პროტესტი", — განაცხადა ერთ-ერთმა აქტივისტმა.

On.ge აღნიშნულზე დაუკავშირდა შინაგან საქმეთა სამინისტროს და ინფორმაციას განახლებისთანავე შემოგთავაზებთ.

ექსპრეზიდენტ მიხეილ სააკაშვილის გათავისუფლების მოთხოვნით, 15 ადამიანი სარფიდან რუსთავის ციხემდე ფეხით მიემართება. მსვლელობა 23 ოქტომბერს დაიწყო.