ექსპრეზიდენტ მიხეილ სააკაშვილის განცხადებით, ზუსტად იცის, რომ მის და საქართველოს გამათავისუფლებელ კოლონას ზუგდიდელები ჩაუდგებიან სათავეში.

"უკვე მერამდენედ, საქართველოს გათავისუფლება სამეგრელოდან იწყება. იცით, ამ ჰაერს კიდევ რა ჰქვია, ეს თავისუფლების ჰაერია, ზუსტად ვიცი, რომ თქვენ იქნებით იმ კოლონის სათავეში, რომელიც სრულიად საქართველოს გაათავისუფლებს და გამათავისუფლებს მეც", — ამბობს ის მიმართვაში, რომელიც ზუგდიდში, აქციაზე წაიკითხეს.

სააკაშვილი ამბობს, რომ ის პუტინისა და ბიძინა ივანიშვილის პატიმარია, რადგან მას ლაზიკის აშენება და მდიდარი საქართველო სურდა.

"მე ვარ პუტინის პირადი პატიმარი, ვინაიდან, მინდოდა ლაზიკა, მინდოდა მდიდარი საქართველო, მინდოდა მომეცა თქვენთვის წარმატება და მომავალი, ლაზიკა აუცილებლად აშენდება, ჩემი ოცნების ქალაქი, როგორც ზუგდიდის გაგრძელება, რაც პირეოსია ათენისთვის, როგორც დუბაი და სინგაპური, საქართველოა კავკასიისა და მთელი შავიზღვისპირეთისთვის რეგიონის მთავარი ცენტრი, სადაც მინიმალური ხელფასი იქნება 1000 დოლარი, მე თქვენებური ვარ", — ამბობს სააკაშვილი.

ზუგდიდში ერთიანი ნაციონალური მოძრაობის აქცია — "ბრძოლა გამარჯვებისთვის, ბრძოლა მიშას თავისუფლებისთვის" იმართება.

აქცია ზუგდიდში ანა წითლიძემ 26 ოქტომბერს დააანონსა. აღსანიშნავია, რომ დღეს, 27 ოქტომბერს აქცია ქართულმა ოცნებამაც გამართა. მათ მიერ დაანონსებული "პარტიის მხარდამჭერების შემაჯამებელი საარჩევნო შეკრება" თბილისში, თავისუფლების მოედანზე გაიმართა.