ქართული ოცნების დეპუტატის, მიხეილ ყაველაშვილის განცხადებით, ერთადერთი, ვის მიმართად ის შეიძლება სოლიდარული იყოს, ქვეყნის პრეზიდენტი, სალომე ზურაბიშვილია, რომელმაც თქვა, რომ ექსპრეზიდენტ მიხეილ სააკაშვილს არასდროს შეიწყალებს. ყაველაშვილის საზოგადოებას, რომელიც სააკაშვილის გათავისუფლებას ითხოვს, მოუწოდებს "თავს მოერიონ".

"თუ შეიძლება მე სოლიდარული ვიყო, სოლიდარული ვიქნები მოქმედი საქართველოს პრეზიდენტის მიმართ, რომელმაც განაცხადა, რომ [სააკაშვილს] არასოდეს არ შეიწყალებს, იმიტომ, რომ მას ახსოვს ირინა ენუქიძის თვალები, მას ახსოვს ბუტა რობაქიძის დედის თვალები და გვახსოვს უამრავი დანაშაული და მოერიეთ თქვენს თავს, ჩემო კოლეგებო და ძვირფასო საზოგადოებავ, მოერიეთ თქვენს თავს.

სააკაშვილი დღეს როგორც გინდათ, რომ წარმოაჩინოთ, ის არ ჩამოსულა და არ ჩაბარებულა. დააკვირდით, აბა ამ ტელევიზიების ნარატივს, ჩაბარდა, რა ჩაბარდა, ის შემოიპარა როგორ ვირთხა და ის დაკავეს, და არა ჩაბარდა", — ამბობს ყაველაშვილი.

ყაველაშვილის მტკიცებით, მიხეილ სააკაშვილის მხარდამჭერ აქციაზე "ფულით გადახდილი" 15 000 ადამიანი იყო შეკრებილი.

"მას ჰქონდა დესტაბილიზაციის გზა, რომ არეულიყო და თითქოს იქ რომ წარმაჩინეს, რომ 100 000-მდე და 60 000-მდე კაცი იყო, დაახლობით 15 000-მდე მაქსიმუმ, ფულით გადახდილი უამრავი ადამიანი ჩამოყვანილი. აი, იმ ადამიანებს უნდა ვუთხრა, რითიც დავიწყე იმით დავამთავრებ, რომ ნაცობა სირცხვილი არ არის, ნაცობა ბოროტებაა, სირცხვილი არის ამ ორგანიზაციასთან ურთიერთობა", — აღნიშნავს ის.

სალომე ზურაბიშვილმა 1 ოქტომბერს განაცხადა, რომ ექსპრეზიდენტს არასდროს შეიწყალებს.

14 ოქტომბერს თავისუფლების მოედანზე მიხეილ სააკაშვილის მხარდასაჭერი აქცია გაიმართა. სააკაშვილის მხარდამჭერ აქციაზე ათასობით ადამიანი საქართველოს სხვადასხვა რეგიონიდან ჩამოვიდა. სიტყვით გამოსვლისას სააკაშვილის ადვოკატმა, ნიკა გვარამიამ ექსპრეზიდენტის მორიგი წერილი წაიკითხა. წერილში ის საზოგადოებას "დიდი შერიგებისკენ" მოუწოდებს და ამბობს, რომ გვერდზე უნდა გადავდოთ წყენა და უარყოფითი ემოციები, რადგან კიდევ ერთი რევანში მორალურად გაგვანადგურებს.