კრიტიკული შეფასებების პასუხად, პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი ამბობს, რომ ევროპარლამენტარების განცხადებები სახარება არ არის. ის აღნიშნავს იმასაც, რომ "პოლიტიკოსების განცხადებების ზედმეტი დრამატიზირება საჭირო არაა".

"გასაგებია, ევროპარლამენტარები დამოუკიდებელი ადამიანები არიან და ყველაფერი შეუძლიათ თქვან. არა, არ უნდა გადადგეს ირაკლი ღარიბაშვილი. [...]

გასაგებია, ევროპარლამენტარების განცხადება სახარება არ არის, უკაცრავად", — აცხადებს ბოჭორიშვილი მთავართან.

7 ოქტომბერს ევროპარლამენტარებმა ანდრიუს კუბილიუსმა და რასა იუკნევიჩიენემ გაავრცელეს წერილი, რომლითაც საქართველოში გამართულ არჩევნებს, ექსპრეზიდენტ მიხეილ სააკაშვილის საქართველოში ჩამოსვლას, დაკავებასა და პრემიერმინისტრის, ირაკლი ღარიბაშვილის განცხადებას ეხმაურებიან. მათ წერილში ვკითხულობთ, რომ სააკაშვილის საქმე პოლიტიკურად მოტივირებულის ელფერს აჩენს და ღარიბაშვილის მუქარა მიუღებელია.

ევროპარლამენტარები აღნიშნავენ, რომ ქართული ოცნების ლიდერების პირადი თავდასხმები ოპოზიციური პარტიების ლიდერების წინააღმდეგ და ვარდების რევოლუციის მიღწევების დაკნინება უბრალოდ ამაზრზენია.

3 ოქტომბერს ღარიბაშვილი ციხეში მყოფ ექსპრეზიდენტს დაემუქრა და თქვა, რომ "წესიერად უნდა მოიქცეს", წინააღმდეგ შემთხვევაში მას სხვა მუხლები დაემატება. ევროპარლამენტარები აცხადებენ, რომ პრემიერმინისტრის მუქარა აჩვენებს, რომ სააკაშვილის საქმე პოლიტიკურია და ევროკავშირის ნებისმიერ ქვეყანაში, მთავრობის წარმომადგენლისგან მსგავსი განცხადების შედეგი მისი დაუყოვნებლივ გადადგომა იქნებოდა.