5 ოქტომბერს ტვიტერზე გავრცელდა ინფორმცია, რომ თბილისმა ირანის მოქალაქეებსა და სატვირთო ავტომობილებს საქართველოს ტერიტორიაზე შესვლა აუკრძალა. სოციალურ ქსელში მედიისა და მოქალეების ნაწილი წერდა იმის შესახებ, რომ ისინი სომხეთ-საქართელოს საზღვართან არიან გაჩერებულები.

"საქართველომ ირანის მოქალაქეებსა და სატვირთო მანქანებს ქვეყანაში სახმელეთო გზით შესვლა აუკრძალა და ყველა გზა ჩაკეტა. ასობით ირანული სატვირთო მანქანა, რომელიც საქართველოში სომხეთის გავლით შედის და რუსეთის საზღვრის გადაკვეთას ცდილობს, ამ დროისათვის შეჩერებულია და საზღვარზე იცდიან", — წერს INTELSky.

პოსტებში, ასევე, ეწერა, რომ მთავრობა მათ რუსეთში გამგზავრების საშუალებას სომხეთის გავლის გამო არ აძლევს.

"საქართველომ ირანის მოქალაქეებსა და სატვირთო მანქანებს ქვეყანაში შესვლა აუკრძალა. მიზეზი ჯერჯერობით უცნობია. ასობით სატვირთო მანქანა ამჟამად სომხეთ-საქართველოს საზღვართანაა გაჩერებული", — წერს ტვიტერის ერთ-ერთი მომხმარებელი.

გავრცელებულ ინფორმაციასთან დაკავშირებით On.ge თავდაპირველად საგარეო საქმეთა სამინისტროს დაუკავშირდა, საიდანაც ეკონომიკის სამინისტროში გადაგვამისამართეს. ამ უკანასკნელის პრესსამსახურში კი გვითხრეს, რომ კომენტარს ფინანსთა სამინისტრო გააკეთებდა.

ფინანსთა სამინისტროს შემოსავლების სამსახური აცხადებს, რომ აღნიშნული შეზღუდვა რუსეთის ფედერაციის მხარეს, ლარსის საბაჟო გამშვებ პუნქტზე მიმდინარე სამშენებლო/სარეაბილიტაციო სამუშაოებს უკავშირდება და რომ ტექნიკური მიზეზით გამო შექმნილი პრობლემა მხოლოდ ირანის მოქალაქეებს არ ეხებათ.

შემოსავლების სამსახურის ცნობით, იგივე მიზეზის გამო, საქონლის შემოტანა/გატანის გარდა, საქართველოს საბაჟო ტერიტორიაზე ფიზიკური პირებიც შეფერხებით გადაადგილდებიან.

"აქვე აღვნიშნავთ, რომ რუსეთის ფედერაციის მხარეს სამშენებლო სამუშაოების დასრულებისთანავე, საბაჟო გამშვები პუნქტი — ყაზბეგი, ჩვეულ რეჟიმში, სრული დატვირთვით იმუშავებს. შესაბამისად, მგზავრებისა და ტვირთების გატარება შეუფერხებლად მოხდება (ზემოაღნიშნული მიზეზით, რუსეთის მხარე ვერ უზრუნველყოფს საერთაშორისო ტვირთბრუნვის უწყვეტი ნაკადის მიღებას)", — აცხადებენ შემოსავლების სამსახურში.

მათივე ინფორმაციით, საბაჟო გამშვები პუნქტი ყაზბეგი 24-საათიან რეჟიმში მუშაობს და დღე-ღამეში შესაძლებელია 1 000-ზე მეტი სატვირთო ავტომობილის გატარება.

"შექმნილი მდგომარეობიდან გამომდინარე, შემოსავლების სამსახური საქართველოს შინაგან საქმეთა სამინისტროს საპატრულო პოლიციის, სახმელეთო ტრანსპორტის სააგენტოსა და სხვა სახელმწიფო უწყებებთან ერთად, აქტიურად მუშაობს საერთაშორისო სატვირთო გადაზიდვების განმახორციელებელი ავტომობილების რიგების აღმოსაფხვრელად, რათა მეზობელი სახელმწიფოებიდან რუსეთისა და შუა აზიის ქვეყნების მიმართულებით ტრანზიტულად გადაადგილებული სატრანსპორტო საშუალებებისათვის ალტერნატიული მოძრაობის მარშრუტები განისაღვროს", — წერია განცხადებაში.