ქართული ოცნების დეპუტატი, გურამ მაჭარაშვილი ამბობს, რომ მიხეილ სააკაშვილი საქართველოში ხილბოსტნეულთან ერთად შემოიპარა. მისივე თქმით, ექსპრეზიდენტი მზად რომ ყოფილიყო ციხეში ჩასაჯდომად, პირდაპირი გზით შემოვიდოდა და ჩაბარდებოდა ქართულ მართლმსაჯულებას.

"მას სურდა ქვეყანაში დესტაბილიზაცია და ე.წ. რევოლუციების მოწყობა. ამაზე ისიც მიუთითებს, რომ ის არ შემოვიდა ოფიციალურად. მას თუ ჰქონდა განზრახვა, რომ ჩაჯდებოდა და მაგალითად, მოიხდიდა ვალს, ჩვეულებრივ შემოვიდოდა, განაცხადებდა. რამდენიმე თავისი მომხრე მაინც დახვდებოდა აეროპორტში და იტყოდა, რომ აი, მე შემოვედი "ვაჟკაცურად" და ჩავბარდი ქართულ მართლმსაჯულებას.

მაგრამ ეს მან ვერ გააკეთა და რაღაცა ხილბოსტნეულთან ერთად შემოიპარა ქვეყნის პრეზიდენტი საქართველოში. აქაც კი ვერ გაბედა და ვერ თქვა, რომ მას სურდა გარკვეული ტიპის დესტრუქცია საქართველოში", — ამბობს გურამ მაჭარაშვილი.

არჩევნების წინა დღეს, პირველ ოქტომბერს მიხეილ სააკაშვილმა დაპოსტა, რომ საქართველოში იმყოფებოდა. რამდენიმე საათში მან კდევ ორი ვიდეო გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას. ქართულ ოცნებაში ამტკიცებდნენ, რომ ის არათუ ქვეყანაში არ შემოსულა და კვლავ უკრაინაში იყო. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს.