სამტრედიის რაიონულმა სასამართლომ ოჯახის წევრზე ძალადობისა და შემაკავებელი ორდერით გათვალისწინებული მოთხოვნების განმეორებით შეუსრულებლობისთვის ბრალდებული ა.მ., დამნაშავედ სცნო და სასჯელის სახედ და ზომად ერთი წლითა და ექვსი თვით თავისუფლების აღკვეთა განუსაზღვრა.

ბრალდების ვერსიით, წარსულში ცოლის მიმართ განხორციელებული ფიზიკური ძალადობის ბრალდებით ნასამართლევმა ა.მ.-მ ყოფილ ცოლს რამდენჯერმე მიაყენა შეურაცხყოფა.

2016 წლის 30 დეკემბერს ყოფილი ცოლის სიტყვიერი შეურაცხყოფის ბრალდებით, სასამართლომ მის მიმართ შემაკავებელი ორდერი გამოსცა. ა.მ.-მ შემაკავებელი ორდერით გათვალისწინებული მოთხოვნები და ვალდებულებები დაარღვია და 2017 წლის იანვარში ყოფილ ცოლს საცხოვრებელ სახლში რამდენჯერმე მიუვარდა და არასრულწლოვანი შვილების თანდასწრებით სიტყვიერი შეურაცხყოფა მიაყენა.

სამართალდამცველებმა ბრალდებული 17 იანვარს, ბაღდათის რაიონის სოფელ ვარციხეში დააკავეს. მას ბრალდება სისხლის სამართლის კოდექსის 1261-ე მუხლის მეორე ნაწილის ბ და ე ქვეპუნქტებითა და 111, 3811 მუხლის პირველი ნაწილით ედავება.