ბოლო წლებში მიღწეული წარმატებების შემდეგ, სად აღარ წარმოვიდგენდით დემნა გვასალიას, თუმცა, ვინ იფიქრებდა, რომ მოდის დიზაინის ქართველი ინოვატორი მსოფლიოში ერთ-ერთ ყველაზე პოპულარულ ანიმაციაში, სიმპსონებში, ამოყოფდა თავს.

კი, სიმპსონების სპეციალურ ეპიზოდში თქვენ ბალენსიაგას შემოქმედებით ხელმძღვანელსა და Met Gala 2021-ის ნამდვილ ვარსკვლავს იხილავთ.

ყველაფერი კი იმაზე უფრო საინტერესოა, ვიდრე ეს ერთი შეხედვით ჩანს. რეალურად, დემნამ კი არ ამოყო სიმპსონებში თავი, სიმპსონები აღმოჩნდნენ ბალენსიაგას ორიგინალურ შოუში. ბრენდმა ცნობილი ანიმაციის შემქმნელებთან ითანამშრომლა, რათა პარიზში გამართულ ღონისძიებაზე 2022 წლის გაზაფხული/ზაფხულის კოლექცია წარედგინა.

"სიმპსონები, თავისი ირონიული ტონისა და ცოტათი გულუბრყვილო რომანტიკული მხარის გამო ყოველთვის მიყვარდა", — ამბობს დემნა და დასძენს, რომ როცა პროდიუსერებს შეეხმიანა, თანამშრომლობაზე მათი დათანხმების იმედი დიდად არ ჰქონდა, — "თუმცა, დამთანხმდნენ. პარლამენტის ლურჯი შოუ ნახეს და მოეწონათ".

10-წუთიან ანიმაციაში ვხედავთ, როგორ არწმუნებს ჰომერ სიმპსონი ბალენსიაგას შემოქმედებით ხელმძღვანელს, რომ მარჯ სიმპსონისთვის კაბა შექმნას. საბოლოოდ კი, ისე ხდება, რომ მთელი სპრინგფილდი ბალენსიაგას შოუდ იქცევა. ანიმაციის პოპულარული პერსონაჟები ბრენდის წინათ შექმნილი სამოსებით ჩნდებიან და აუდიტორიის წინაშე პოზირებენ. დამსწრეებში კი, Vogue-ის რედაქტორი, ანა ვინტურიც ჩანს.

ანიმაციური ვიდეოს პრემიერა Place du Chatelet-ში გაიმართა. ვარსკვლავებით დახუნძლულ ღონისძიებას არც წითელი ხალიჩა აკლდა და არც ფოტოგრაფები. რამდენიმე ცნობილი ადამიანი ახალი კოლექციის ლუქებითაც გამოჩნდა. მათი უმეტესობა ბალენსიაგას თანამშრომლები და ბრენდის მეგობრები იყვნენ: Cardi B, ელიოტ პეიჯი, ნაომი კემპბელი, იზაბელ იუპერი, ლუის ჰამილტონი და სხვები.

ფოტო: Geoffroy Van De Hasselt / Getty Images

სექტემბრის დასაწყისში ქართველი დიზაინერის შექმნილი ლუქებით მოდის სფეროს წლის ყველაზე მნიშვნელოვან ღონისძიებაზე, Met Gala-ზე, არაერთი ცნობილი ადამიანი გამოჩნდა. რამდენიმე დღის წინ გვასალია ამერიკის მოდის დიზაინერთა საბჭოს ჯილდოზეც წარადგინეს (რომელიც ერთხელ უკვე მოგებული აქვს), სულ ცოტა ხნის წინ კი, პრეზიდენტმა ზურაბიშვილმა იგი ღირსების მედლით დააჯილდოვა.