თვითმმართველობის არჩევნების შედეგები ცნობილი არ არის და ორი ეგზიტპოლით, თბილისში მეორე ტური იქნება, თუმცა კახა კალაძე მხარდაჭერისთვის მადლობას იხდის. მეტიც, ქართული ოცნების ოფისში საზეიმო ღონისძიება მიმდინარეობს, რომლისთვისაც პარტია დღის განმავლობაში ემზადებოდა.

"დღევანდელი დღე გახდება საქართველოს მშვიდობიანი განვითარების მყარი საფუძველი. შემდეგი არჩევნები საქართველოში 2024 წელს ჩატარდება. განსაკუთრებული მადლობა მინდა გადავუხადო თბილისს და თბილისელებს დღევანდელი მხარდაჭერისა და თანადგომისთვის. ეს გამარჯვება მაძლევს ახალ სტიმულს, რომ გაორმაგებული ენერგიით ვიზრუნო და ვიშრომო თბილისის განვითარებისთვის, თბილისელების წინაშე არსებული საკითხების გადაჭრისთვის, მეტი სიცოცხლის შესატანად თითოეულ უბანში", — განაცხადა კალაძემ პარტიის ოფისში გამართულ ბრიფინგზე.

ჟურნალისტების კითხვას Edison Research-ისა და IPSOS-ის ეგზიტპოლების შედეგების შესახებ კალაძე პასუხობს:

"თუ არ გჯერათ ჩვენი ეგზიტპოლის შედეგები, შეგიძლიათ დაელოდოთ ცესკოს მონაცემებს".

რამდენიმე წუთის წინ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს.