ქუთაისის მერობის კანდიდატის, ხატია დეკანოიძის თქმით, ქუთაისში, ყველაზე ოპოზიციურ უბნებზე შუქს მასობრივად თიშავენ.

"ქუთაისში, ყველაზე ოპოზიციურ უბნებზე შუქს მასიურად აქრობენ! ავტოქარხანაშიც გათიშეს!", — წერს დეკანოიძე ფეისბუქგვერდზე.

ამავეს აცხადებს ნაციონალური მოძრაობის ერთ-ერთი ლიდერი, ლევან ხაბეიშვილი.

"საარჩევნო უბნებზე მასიურად აქრობენ შუქებს. 1 საათი და 30 წუთი დარჩა არჩევნების დასრულებამდე. კრიმინალური ოცნება მარცხდება ქართველ ხალხთან. მოდი არჩევნებზე", — წერს ის.

On.ge აღნიშნულზე დაუკავშირდა ენერგო პრო ჯორჯიას, სადაც აცხადებენ, რომ ქუთაისში, გამსახურდიას ქუჩაზე ავარიული გამორთვა იყო 20 წუთის განმავლობაში, თუმცა ახალა ელექტროენერგია აღდგენილია.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.