საერთაშორისო გამჭვირვალობა — საქართველოს ინფორმაციით, მარნეულის საარჩევნო ოლქის მე-13 უბანზე სტუდენტური პროფესიული კავშირის დამკვირვებელმა ორჯერ მისცა ხმა, მესამე მცდელობისას კი ერთ-ერთმა კომისიის წევრმა შეაჩერა.

მნიშვნელოვანია ისიც, რომ ორგანიზაციის ცნობით, ის ამ კონკრეტულ უბანზე რეგისტრირებულიც კი არ იყო. იმავე უბანზე, სავარაუდოდ, კიდევ რამდენიმე პირმა მისცა ხმა რამდენჯერმე.

"აქ არის სავარაუდო კარუსელი და TI აპირებს მოითხოვოს ამ უბანზე კენჭისყრის შეწყვეტა და ამ უბნის შედეგების გაბათილება", — აცხადებენ ორგანიზაციაში.

მათივე თქმით, დააფიქსირეს 100-მდე წვრილი და შედარებით სერიოზული დარღვევა, დამკვირვებლებმა კი დაწერეს 14 საჩივარი.

გარდა ზემოთ აღნიშნული სავარაუდო კარუსელის ფაქტისა, მარნეულის აღნიშნულ უბანზე დაფიქსირდა დამკვირვებლებისთვის ხელშეშლა. ორგანიზაციის ინფორმაციით, აქ უბანთან 50-მდე ადამიანია მობილიზებული, რის შესახებაც შსს-ს ინფორმაცია უკვე აქვს.

ორგანიზაციის განცხადებით, პრობლემურია რამდენიმე უბანი დუშეთშიც, სადაც ამომრჩევლის სავარაუდო მოსყიდვაზე საუბრობენ, კონკრეტულად კი პირზე, რომელიც საარჩევნო უბანთან ფულს არიგებდა. კენჭისყრის ფარულობა დაირღვა ფოთში, 33-ე უბანზე ორგანიზაცია მწვანე დედამიწის დამკვირვებელი კენჭისყრის კაბინაში შეყვა ამომრჩეველს. ზოგადად კი, ყველა უბანზე, რომელზეც TI-ის დამკვირვებლები არიან, მობილიზებულია კოორდინატორები.