პოლიტიკური პარტია დროას დამფუძნებელმა, თბილისის საკრებულოს თავმჯდომარეობისა და გლდანის მაჟორიტარი დეპუტატობის კანდიდატმა, ელენე ხოშტარიამ მე-12 საარჩევნო უბანზე ხმა მისცა.

მისი განცხადებით, დღევანდელი არჩევნები არა ოპოზიციისთვის, არამედ ქვეყნისთვისაა რეფერენდუმი.

"მოქალაქეებს აქვთ ძალა, ხალხი წყვეტს, როგორ მოსწონთ ცხოვრება. მათ აქვთ დიდი, მრავალფეროვანი არჩევანი, შეუძლიათ აირჩიონ ნებისმიერი ოპოზიციური პარტია და მართლა საფუძველი ჩაუყარონ იმას, რომ არცერთი ხელისუფლება არ იყოს თავგასული, არ ჩაგრავდეს ადამიანებს. ესაა არჩევნები, რომელიც განსაზღვრავს ჩვენს მომავალს ძალიან დიდი ხნით, ამიტომ მე დარწმუნებული ვარ ეს რეფერენდუმი შედგება", — ამბობს ელენე ხოშტარია ფორმულასთან ინტერვიუში.

მისი თქმით, რეფერენდუმში ხმას აძლევს იმას, რომ "საქართველო არ იყოს ვიღაცაზე დამონებული".

"რეფერენდუმში ხმას მივცემ იმას, რომ მოქალაქეები არ იყვნენ ინსტრუმენტები ვიღაცის ხელში, არამედ იყვნენ ღირსეული მოქალაქეები თავისი განსხვავებით.. ჩვენ გვჭირდება თავისუფალი ნება, ვინც როგორც გადაწყვეტს ისე იცხოვროს და არა ისე, როგორც დააძალებენ. ადამიანები არ უნდა იჩაგრებოდნენ პოლიტიკური ნიშნით, არ კვდებოდნენ. გუშინ მახსენდებოდა ია კერზაია, ლუკა სირაძე, უამრავი ადამიანი, რომლებიც ვერ მოესწრნენ ამ არჩევნებს, რადგან ვიღაცამ გადაწყვიტა, უბრალოდ დაამციროს ისინი, დაჩაგროს. ასეთი ქვეყანა ჩვენ არ უნდა გვქონდეს და დღეს ის შეიცვლება", — განაცხადა ხოშტარიამ.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.