თბილისის მერობის კანდიდატის, კახა კალაძის განცხადებით, დღეს დამკვირვებლებთან შეხვედრაზე ისაუბრა სამომავლო გეგმებზე და მათ უთხრა ისიც, რომ ხვალ პირველივე ტურში "დაამთავრებს არჩევნებს". ამის შესახებ მან შეხვედრის შემდეგ ჟურნალისტებთან ისაუბრა.

"როგორი იქნება ქალაქი მომდევნო 4 წლის განმავლობაში, რა პროექტები განხორციელდება, ვესაუბრეთ ყველაფერ ამაზე და ვისაუბრე, ასევე, ჩემს საარჩევნო კამპანიაზე, თუ როგორი პოზიტიური საარჩევნო კამპანია მქონდა და ვუთხარი, ასევე, ისიც, რომ ხვალ პირველივე ტურში დავამთავრებ არჩევნებს", — განაცხადა მან.

30 სექტემბერს საქართველოში ევროპარლამენტარები ჩამოფრინდნენ. ისინი 2 ოქტომბერს თვითმმართველობის არჩევნებს დააკვირდებიან. არჩევნებს ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.