ერთიანი ნაციონალური მოძრაობის ერთ-ერთი ლიდერი, ხატია დეკანოიძე მთავარი არხის მიერ გავრცელებულ მასალებთან დაკავშირებით ამბობს, რომ აქ მთავარი ის, თუ რას აკეთებს მოშე კლუგჰაფტი, არათუ ის, თუ რას აკეთებს სახელისუფლებო გუნდი.

"აქ ხო მთავარი არ არის ეს ადამიანი რას აკეთებს, მთავარი არის რას აკეთებს სახელისუფლებო გუნდი. ზიზღით, წარმოუდგენელი აგრესიით, სიტყვა-სიტყვით, ოპონენტების გაშავებით, წარმოუდგენლად მძიმე აგრესიული ფონი აქვთ წინასაარჩევნოდ. მათ შორის ძალადობრივიც, მოდი ასე ვთქვათ. ამიტომ, შესაბამისად, აქ მთავარი ქართული ოცნების მიერ ბიუჯეტის ფულის გადაყრა ზუსტად ამ წინასაარჩევნო ზიზღის კამპანიაში", — თქვა დეკანოიძემ.

მთავარმა არხმა 28 სექტემბერს გაავრცელა ინფორმაცია ებრაელი პოლიტტექნოლოგის, მოშე კლუგჰაფტისა და ქართული ოცნების კონტრაქტის შესახებ, რომლის მიხედვითაც 2021 წლის თვითმმართველობის არჩევნებში გასამარჯვებლად რამდენიმე მიზანია გაწერილი. მთავარი არხის მიერ გამოქვეყნებულ მასალებში წერია, რომ ამ მიზნებში აღნიშნულია ოპოზიციური არხების, ცალკეული ჟურნალისტების დისკრედიტაცია და ასევე, ყოფილი პრემიერმინისტრის, გიორგი გახარიას წინააღმდეგ "კარგად დაგეგმილი და ღრმად დახვეწილი სტრატეგიის" დაგეგმვის საჭიროება. დოკუმენტში, ასევე, აღნიშნულია, რომ გახარიას წინააღმდეგ ერთ-ერთ სტრატეგიად ნარკოტიკის მოხმარებასთან დაკავშირებული ნარატივის შექმნა განიხილებოდა.