ევროპულ საქართველოში აცხადებენ, რომ ოპოზიციის ნაწილის საერთო პრესკონფერენციის შესახებ ინფორმაცია არ ჰქონდათ. ამის შესახებ On.ge-ს პარტიის გენერალურმა მდივანმა, აკაკი ბობოხიძემ განუცხადა.

"დღევანდელი შეხვედრის ორგანიზატორი ევროპული საქართველო არ ყოფილა. მიკვირს, რომ საქმის კურსში არ ვიყავით. მიუხედავად ახალგაზრდობისა, საკმაოდ გამოცდილი პოლიტიკოსები არიან და ყველანი უნდა ვხვდებოდეთ, მით უმეტეს, ის პოლიტიკური პარტიები, რომლებიც ვთანხმდებით, რომ კოალიციური მმართველობა უნდა დავაფუძნოთ სამომავლოდ საქართველოში, კოალიცია საჭიროებს ურთიერთშეთანხმებების და პარტნიორების პატივისცემას არამხოლოდ გამარჯვების შემდეგ, არამედ პირიქით, მანამდე მით უმეტეს. მსგავსი ტიპის შეცდომები, სამწუხაროდ, უსაფუძვლოდ, მაგრამ გარკვეულ ეჭვებს აჩენს, რაც არ არის სასურველი არჩევნების წინ და იმედი მაქვს, რომ დარჩენილ 2-3 დღეში მსგავსი ტიპის შეცდომებს კვლავ არ დაუშვებენ", — აცხადებს აკაკი ბობოხიძე.

On.ge-ს კითხვას, კანდიდატების მხარდაჭერასთან დაკავშირებით შეთანხმება კვლავ ძალაში რჩება თუ არა, ბობოხიძე ასე პასუხობს:

"რა თქმა უნდა, ძალაშია. არანაირი საფუძველი ეჭვიანობისთვის არ არსებობს, მიმაჩნია, რომ უბრალოდ შეცდომაა და კარგი იქნება, თუ მომავალში გაითვალისწინებენ. შეთანხმება ძალაში რჩება. ნებისმიერ შემთხვევაში, ევროპული საქართველო არის შეთანხმებების ერთგული და კარგი იქნება, თუ ყველა პატივს სცემს შეთანხმებებს. ჩვენ ბოლომდე უნდა მივიყვანოთ ჩვენი მთავარი ამოცანა — ბიძინა ივანიშვილი უნდა დამარცხდეს, ეს არის სასიცოცხლოდ აუცილებელი ჩვენი ქვეყნისთვის, თითოეული მოქალაქისთვის და მათ შორის, ევროპული საქართველოს წევრებისთვის", — აცხადებს ბობოხიძე.

On.ge ამ საკითხზე ნაციონალური მოძრაობის პრესსამსახურს დაუკავშირდა, სადაც ამბობენ, ეს "არ იყო კოალიციური ფორმატი".