ლელოს თბილისის მერობის კანდიდატი, ანა ბიბილაშვილი ირაკლი ღარიბაშვილის განცხადებას, რომ ქვეყანაში ადამიანების სიცოცხლე დაცულია ტყუილს უწოდებს და ქართულ ოცნებას კრიმინალთან ინტეგრირებაში ადანაშაულებს.

ამის შესახებ ბიბილაშვილმა სპეციალურად გამართულ ბრიფინგზე განაცხადა, რომელიც ქვეყანაში გაზრდილ კრიმინალს ეხებოდა.

"პრემიერ-მინისტრის განცხადება, რომ ქართული ოცნების მმართველობის 9 წლის თავზე ქვეყანაში ადამიანების სიცოცხლე დაცულია, არის დაცინვა. მაშინ როდესაც, ჯერ კიდევ გუშინ ადამიანები აიყვანეს მძევლებად და მათ სიცოცხლეს შეუქმნეს საფრთხე, სულ ცოტა ხნის წინ მოკლედ უცხოელი სტუმარი, ამ ქვეყანაში რეალურად ჩვენ არ ვართ დაცული. არც მე არც თქვენ არც ჩვენი შვილები. არა მარტო თბილისში, სხვა ქალაქებში და სოფლებშიც არ ვართ უსაფრთხოდ", — აცხადებს ბიბილაშვილი.

მისი თქმით, ქვეყანაში შიშია დანერგილი. "ჩვენ შვილებს ვუშვებთ გარეთ და არ ვიცით როგორ დაბრუნდებიან სახლში. შიშია დანერგილი ქვეყანაში. რასაც ცდილობს ქართული ოცნება რომ გვაჩვენოს, თითქოს ყველაფერი რიგზეა არის დიდი ტყუილი. რეალობა კი მხოლოდ ერთია — ქართული ოცნება კრიმინალთანაა შეკრული", — განაცხადა ბიბილაშვილმა.